فالمجموع وصلنا ل2855.. وها تفاصيل توزيع الإصابات بفيروس كورونا فكَاع جهات وأقاليم المغرب

علنات جميع المديريات الجهوية للصحة، اليوم الأحد فالعشية فالصفحة ديالها على موقع التواصل الاجتماعي "فيسبوك"، على تفاصيل الإصابات بفيروس كورونا المستجد فمختلف أقاليم المملكة فهذ 24 ساعة الأخيرة، يعني من الستة دالعشية دلبارح السبت حتى للستة دالعشية داليوم الأحد.
وحتى الجهات اللي ما علنوش على الإصابات بالفيروس هذ الصباح مع الجهات الأخرى دابا ها هوما علنو عليها فالحصيلة ديال الستة، من بعد ندوة وزير الصحة خالد آيت الطالب، وبالتالي جميع الجهات دابا كشفات على التفاصيل ديال الإصابات بالفيروس عندها اليوم.
جهة الدار البيضاء سطات كتجي فمقدمة الترتيب بالمجموع 782 إصابة بالفيروس، منهم 37 وفاة و108 دالحالات اللي تشافاو. بالنسبة للأقاليم ف47 إصابة فسطات، 46 إصابة فالنواصر، 30 إصابة فمديونة، المحمدية 30، مديونة 16، برشيد 13، الجديدة 10، وبنسليمان وسيدي بنور 0 حالة. بنسبة لعمالات مدينة الدار البيضاء (سجلات فالمجموع 620) فعمالة أنفا سجلات 199، تابعاها عين السبع الحي المحمدي ب102، عين الشق 87، البرنوصي 77، مولاي رشيد 44، الحي الحسني 41، الفدا 40، وبنمسيك 30.
كتجي من موراها فالمركز الثاني جهة مراكش آسفي ب724 حالة مؤكدة، منها 36 وفات، و56 حالة تعافي، وتوزعات على النحو التالي: مراكش 457، الرحامنة 215، الحوز 26، شيشاوة 22، قلعة السراغنة 2، الصويرة 2، واليوسفية وآسفي 0 حالة.
فالمركز الثالث كتجي جهة فاس مكناس اللي سجلات 418 حالة، 23 ماتو، و63 تشافاو. وبخصوص الحالات المسجلة فالأقاليم فتسجلات 246 ففاس، 96 فمكناس، 40 فتازة، 16 فإفران، 11 فصفرو، 7 فتاونات، حالة فالحاجب، حالة فمولاي عقوب، و0 حالة فبولمان.
فالمركز الرابع كتجي جهة طنجة تطوان الحسيمة، بحيت سجلات 312 حالة، 14 لوفات و42 واحد تشافا، وبالنسبة للتوزيع فطنجة أصيلة سجلات 215، تطوان 57، العرايش 26، الحسيمة 13، وزان 1، أما شفشاون والمضيق الفنيدف وفحص أنجرة ماسجلو حتى إصابة.
فالمركز الخامس، جهة الرباط سلا القنيطرة، اللي سجلات جهة الرباط سلا القنيطرة سجلات 273 إصابة، 10 وفيات و98 حالة شفاء، وبالنسبة للإصابات فالأقاليم فالرباط بلغات 117 إصابة، الصخيرات تمارة 78، سلا 48، القنيطرة 22، الخميسات 7، سيدي سليمان حالة واحدة، وسيدي قاسم صفر حالة.
فالمركز السادس كاتجي الجهة الشرقية ب149 حالة مؤكدة، الوفيات 8، واللي تشافاو 15. بالنسبة للتوزيع: وجدة أنكَاد 48، الناظور 39، بركان 37، تاوريرت 9، كَرسيف8، الدريوش7، وجرادة صفر حالة.
المركز السابع جات فيه جهة درعة تافيلالت، بمجموع 86 حالة مؤكدة، 2 وفيات، و15 حالة شفاء. وبالنسبة للحالات فعدد الأقاليم فتسجلات 45 فميدلت، 30 فورززات، 5 فالرشيدية، 5 فزاكَورة، وحالة وحدة فتنغير.
المركز 8 من نصيب جهة بني ملال خنيفرة سجلات 60 حالة مؤكدة، 6 وفيات و10 حالات شفاء. وبالنسبة للحالات فعدد الأقاليم فتسجلات 25 فخريبكَة، 20 فآزيلال، 10 فالفقي بنصالح، 4 فبني ملال، وحالة وحدة فخنيفرة.
المركز 9 جات فيه جهة سوس ماسة، سجلات 44 حالة، منها 5 وفيات و13 واحد تشافا، توزعات على أكادير إداوتانان ب21 حالة، إنزكَان آيت ملول ب16 حالة، طاطا ب4 حالات، اشتوكة آيت باها ب2 حالات، تارودانت بحالة وحدة، وتيزنيت 0 حالة.
فالمركز العاشر كتجي الأقاليم الجنوبية، جهة العيون الساقية الحمرا، بأربع إصابات تسجلات فإقليم بوجدور، وكلها تعافات، ثم جهة الداخلة واد الذهب اللي سجلات 2 إصابات فإقليم واد الذهب، تعافات منها حالة وحدة، وجهة كَلميم واد نون، سجلات حالة وحدة مؤكدة فكَلميم، وهذ الحالة تم الشفاء ديالها.
وبالنسبة لمجموع إحصائيات الإصابات بكورونا فكَاع الأقاليم فهذ ال24 ساعة الأخيرة، وإلى حدود الستة دالعشية من اليوم الأحد، أكد وزير الصحة فالندوة داليوم بللي وصل العدد الإجمالي دالإصابات ل2855 مصاب، 141 توفاو و327 تشافاو.