شهر دابا والجوامع السادين.. من غير تحسر المتحسرين الأبديين فالفايسبوك الأمر مكانش عندو شي أثر كبير ومباشر على المغاربة وعلى الدولة.. بينما البيران والقهاوي سدو الدولة ضاعت فمداخيل مهمة ديال الضريبة وناس كثار بقاو بلا خدمة

شهر دابا والجوامع السادين، من غير تحسر المتحسرين الأبديين فالفايسبوك الأمر مكانش عندو شي أثر كبير ومباشر على المغاربة وعلى الدولة، الشيبانيين لي كيمشيو يصليو فالصلوات الخمس ويتلاقاو بيناتهم ويجمعو كنظن عوضوا الأمر بأنشطة خرى أقل حركية، إلى حين تفوت هاد الجايحة، ومن غير الواليدة لي كتحارب الأمية فالجامع ولي حاليا الأستاذة ديالها بمجهود فردي كبير بزاف باقا متبعة معاهم فالواتساب وكتقريهم عن بعد، وهادشي راه ماشي كتقري دراري كابرين كيستعملو المشاقف راه عيالات كبار كيحاربوا الأمية راه هاد السيدة وكاع الناس لي بحالها أبطال، حيت بلا بيها عمري كنت نتخايل أنني نكتب هدرة للواليدة فواتساب وتجاوبني، وبالإظافة للأمن الروحي فهادي أهم حاجة كتدار فالجوامع ولي كتخليهم عندهم فائدة ملموسة ومباشرة، طبعا هادشي في حالة ماتستاغلش هادشي فالسياسية .
في المقابل إغلاق البيران والقهاوي والكابريات أثر على الإقتصاد ديال البلاد وحرم الدولة ومن مداخيل ضريبية مهمة وكذلك حرم بزاف ديال المواطنين من مدخول شهري، من غير السرباية والمستخدين المباشرين راه حتى داك البرهوش لي كيبيع كلينيكس حدا القهوة، أو السيدة لي مقابلة الطواليط أو العساس ديال الباركينغ، هادو كلهم تأثرو بشكل مباشر وتقطع ليهم دخل كانو عايشين بيه ومعاونهم على الزمان،عاد زيد عاملات وعمال الجنس، لي مادايرينش ليهم خانة خاصة فالموقع ديال التضامن من أجل التوصل بالمساعدة ديال الدولة، بحكم أنهم فقدو الخدمة ديالهم بسباب هاد الجائحة، وهادشي يا حسرة الدولة مزيرة فالقضية ديال الطاسة شوية وماشي غير آجي وشد الرخصة، وحتى الاماكن لي فيها الشراب كتلقاها مخبية ومظلمة والى داخل ليها بحال الى جاي تدير شي جريمة وخاص مايشوفوكش الناس، وهادشي راه العكس خاص التطبيع والتصالح مع الطاسة باش ماتبقاش طابو ونوليو نستهلكوها بعقلانية وبلا تأنيب الضمير.
من بعد كورونا أهم حاجة خاص توقع في المغرب هي يولي كولشي يخلص الضريبة، وتولي صرامة في التتبع الضريبي وعقوبات مقودة للمتهربين من الضريبة، بحال داكشي ديال ميريكان مكتخلصش الضريبة مرة كتلقى راسك تفقرتي وحياتك كلها تدوزها خدام غير على الضريبة، آل كابوني وتشد غير على الضريبة، وملي كنقول كولشي يخلص الضريبة هذا كيعني أن قطاعات كثيرة غير مهيكلة خاصها تنظم بعدا ويولي عندها اطار قانوني، وخاص الدولة تغير توجهها السياحي، وأهم حاجة هي يولي السائح يمكن ليه يريح في سناك وياخد سندويتش ويدوزو بيرة، مايحتاجش أنه يمشي لمطعم مصنف باش يقدر يلقى الطاسة مع الماكلة، وطبعا هادشي يترافق مع التقليل من مظاهر التدين في الفضاء العام، ونقص المصاريف ديال الجوامع والزوايا والأضرحة، راه أبسط عامل نظافة ليوم هو أحسن وأكثر إفادة للبلاد من أي فقيه كاين فيها غير زايد فهاد الوقت.