المغاربة كي العادة بداوها إحسان راه قلبوها سعاية ودابا راه بانو نصابة محترفين فالسعاية، وهادشي لي كيخلي الإحسان يكونوا مشاكلو كثر من الحسنات ديالو، وفعوض بنادم يتحاسب مع الدولة تدير خدمتها كيولي داير الصينية فالفايسبوك

مساعدة المحتاج شي حاجة لي مزيانة، والمغاربة فيهم المحسنين كثار، وشفنا حالات كثيرة ديال ناس فأزمات أو محتاجين عمليات عاجلة أو تبرع أي كان نوعه، وتوصلوا بيه وبكثر كاع، وشفنا حملات ديال المساعدة كينظموها الدراري ديال الكروبات ديال الفايسبوك سواء بالملابس أو بأضحيات الأعياد أو الكتب المدرسية، ولي كتفرح المستفدين، ولكن في نفس الوقت حنا شعب مبلي بالسعاية، وعدد السعاية عندنا فالبلاد الحمد الله خير دليل، وليتي تخرج غير للحانوت تتقدى كوميرة وفرماجة ونص ديال الحليب تلقى واحد ولا وحدة فباب الحانوت كيطلبو، مابقاتش السعاية مقتاصرة على المدينة وبيبان الجوامع، والبلايص فين كيدوز بنادم مرفح، دابا ولات عامة وسط لمقودة عليهم تلقى واحد ولا وحدة قود منهم كيطلبهم وولات حرفة عند بزاف حسن من الخدمة كاع، واخا كانت مقتصرة على العاجزين شحال هادي، دابا ولا يوقف عليك بنادم قد الحيط باغي ميلة.
الموشكيل دابا هو هاد السعاية غزات حتى المواقع الإجتماعية، وبانو العديد من النصابة كاين منهم لي ولا مشهور وراه فالحبس دابا غير من ماكلة رزق عباد الله، ولات خدمتهم يدورو ويقلبو على الناس المعوزين والعاهات والحالات الإنسانية لي تقطع فالقلب ويصورو معاهم فيديو ويجمعو ليهم الفلوس، حنا أصلا شعب اتكالي مفني مكرههاش باردة، العيشة بالريع هي المبتغى ديال الأغلبية،وبحال هاد السلوكات وهاد الفلوس الباردة غتزعم بنادم عليها، وغير دابا راه عرام ديال اليوتوبرز والبودكاستورات هادي هي خدمتهم، يمشي يدور يقلب على الحالات لي محتاجة لمساعدة، والعديد منها خاص الدولة تتكفل بيه ماشي يبقاو يطلبوا بيه أو يعيش بالمساعدات.
التكافل زوين، ولكن يكون مؤسساتي بحال لي كاين فالعالم المتحضر، أما هاد التكافل الإجتماعي بين الأفراد بمعزل على محاسبة الدولة حول دورها ومهامها، وفنفس الوقت بمعزل على مراقبة الدولة لهاد الفلوس لي كتجمع وتمشي لبلاصة وحدة كيفاش حتى تجمعات وعلاش وشكون، حيت فاللخر كيجي بنادم يبكي عند المخزن على فلوسو لي مشاو والنصابة لي خداوهم ليه، وتلقاه داير فيديو كيطلب فيه سيدنا يرجعليه حقو، هاعلاش خاص من اللول يتراقب هادشي، حيت المغاربة كي العادة بداوها إحسان راه قلبوها سعاية ودابا راه بانو نصابة محترفين فالسعاية، وهادشي لي كيخلي الإحسان يكونوا مشاكلو كثر من الحسنات ديالو، وفعوض بنادم يتحاسب مع الدولة تدير خدمتها كيولي داير الصينية فالفايسبوك، حتى ولا الفايسبوك بحال شي باب ديال الجامع بين المنشور والمنشور كتلقى شي حد كيطلب.