علاش كذب مكتب الدراسات اللي تكلف باش يوجد المغرب يخرج من حالة الطوارئ الصحية. "لوديسك" خرج وثائق بينات باللي هادو خدامين مع الحكومة وفقطاعات كثيرة=وثيقة

"لوديسك" فرشات كلشي. هدرات على مقال ديالها هادي يومين على منح الحكومة المغربية مكتب دراسات امريكي اسمو "مجموعة بوسطن للاستشارة" BCG. الحكومة خرجات ببيان عبر وزارة الصحة. قالت. اللا ما كاينش هاد الشي. دارتو بعد ما ناض الصداع.
هاد المكتب كان دار بيان البارح نشراتو "ميديا 24" فين قال باللي "في اطار التعبئة الوطنية ضد كورونا فيروس وبعد الاعلان على حالة الطوارئ الصحية قرر فرع هاد المجموعة فالدار البيضاء يقدم خدماتو فابور لوزارة الصحة. خبرتو فالتحليل ودراسة التجارب الدولية الحديثة فمواجهة هاد الجايحة".وقال البيان باللي هاد التعبئة لصالح وزارة الصحة كتدخل فاطار التضامن الوطني وفابور وما غادينش يتخلصو عليها وباللي هاد المكتب ما عمرو توصل بتكليف من الحكومة باش يوجدو المغرب بعد حالة الطوارئ وكيفاش ترجع الامور بالتدريج.بيان ماشي مقنع ابدا. علاش مكتب دراسات يقدم خدمات فابور؟ هادا هو السؤال. الجواب باش نعرفو شكون فهاد المكتب.
نفس الهدرة قالها بيان وزارة الصحة البارح وفيه باللي "المكتب المعني وضع رهن إشارة الوزارة قدراته في التحليل ودراساته للتجارب الدولية الحالية، وذلك في إطار التعبئة الوطنية لمحاربة وباء فيروس كورونا المستجد المتسبب في مرض كوفيد-19، وغداة إقرار حالة الطوارئ الصحية" وباللي هاد "المبادرة مجانية ونابعة من صميم روح التعاون والتضامن الوطني الذي يقتضي تضافر جهود للتصدي لهاد الجايحة".
"لوديسك" عاود كذبات هاد الشي ديال مكتب الدرسات والوزارة. فرشاتهم بالوثائق. بينات باللي خدامين على قطاعات اخرى بعيدة على الصحة. ففي مقال للجريدة نشرت وثيقة تاريخها 14 ابريل موجهة للحكومة وفيها قدم ملخص على مائدة مستديرة عبر الفيديو كونفيرانس شارك فيها هاد المكتب٬ تضيف مصادر ل"لوديسك".
كان فيها ناس وزارة الداخلية والصحة وخبراء مستقلين. هاد الشي كان على الطلب بعد ما تسالي الجايحة من خلال التجربة الصينية. وشارك فهاد الاجتماع مسؤولين من هاد مكتب الدراسات بالكونكونگ وهدرو على قطاعات المال والطونوبيلات ومواد الاستهلاك وقطاع العقار. طبعا من خلال التجربة الصينية