بعد تسجيل بؤر صناعية دكورونا.. جمعية فيمينيست كتستنكر إخلال أرباب المصانع بشروط السلامة الصحية وتعريض حياة العاملات للخطر

استنكرات الجمعية الديمقراطية لنساء المغرب اللامسؤولية التي يعبر عنها بعض أرباب المعامل والشركات، من خلال التراخي بخصوص فرض الالتزام بالحجر الصحي، كيف قالت، وهذشي انتج عليه ظهور بؤر صناعية ديال فيروس كورونا المستجد فمختلف المعامل فمجموعة من المدن، أهمها كازا اللي سجلات فيها وحدة صناعية 111 إصابة بالفيروس، بالإضافة لوحدة السمك المصبر دالعرايش اللي تسجلت فيها حالة وفاة.
وحيت أرباب المعامل كيخرقو قواعد السلامة ومكايلتازموش بشروط الحجر الصحي فالمصانع ديالهم، كيف قالت الجمعية، حاولو بعض العاملات ياخدو إجازة، وعيا منهم بالوضعية الوبائية اللي كيعرفها المغرب فهذ الفترة، وباش يحميو راسهم والمحيط ديالهم، لكن أرباب العمل فرضو عليهم الاستمرار فالعمل، واستغلو الهشاشة ديالهم وحاجتهم للقوت اليومي، وهذشي خلا الفيروس ينتشر فالوسط الإنتاجي.
والجمعية طالبات، فبلاغ ليها حصلات "كود" عليه، بللي ضروري خاص مفتشي الشغل يراقبو المعامل والشركات وشوفو الظروف الصحية اللي كيشتاغلو فيها العاملات، مع اتخاذ إجراءات صارمة ضد ارباب الشركات والمعامل المستغلين لوضعية النساء الهشة، حيت "كيخص المشغلين يتخذو جميع التدابير اللازمة لحماية سلامة الأجراء وصحتهم بصفة خاصة وحماية أماكن العمل بصفة عامة"، على حد قول الجمعية.