لافوكا دايرة گرون واللحم تواضع شوية. ها ثمن الخضرة والفاكهة فسوق الجملة فكازا

هذ السيمانة الأثمنة ديال الخضرة والفواكه بالكَرو ما تبدلاتش بزاف، كاين اختلاف بسيط بين السيمانة اللي فاتت وهذي، شيحاجة قليلة فالسنتيمات وعلى حساب نوعية المنتوج، باستثناء لافوكا اللي غلات شوية، وثمن اللحم اللي حقق انخفاظ طفيف.
بحال العادة كل أربعاء، دار سوق الجملة للفواكه والخضر التابع للمجلس الجماعي لمدينة كازا ليست جديدة ديال الأثمنة الخاصة بالمنتوجات الفلاحية اللي كيتباعو بالكَرو لهذ السيمانة، باش يحدد السقف ديال الأثمنة والثمن الأدنى ديال المنتوجات الغذائية، على حساب جودة كل منتوج، وهذشي باش ماتكون حتى شي زيادة فهذ الوقت اللي كاتعرف البلاد حالة طوارئ صحية بسبب فيروس كورونا المستجد.
بالنسبة ثمن اللحم بالجملة فالباطوار ديال كازا، فكيف قلنا طاح شي شوية بالمقارنة مع السيمانة اللي فاتت، بنسب متفاوتة بين 2 دراهم حتى ل3 دراهم، بحيت لحم الغنمي ولا يدير فالثمن الأدنى 50 درهم والثمن الأقصى 52 درهم للكيلو، والبكَري الثمن ديالو الأدنى ولا هو 50 درهم، والثمن الأقصى 55 درهم للكيلو.
أما بخصوص الفواكه، لافوكا كيف قلنا هي بوحدها اللي طلعات للسما وولات كدير 13 لدراهم فالثمن الأدنى و27 درهم فالأقصى، البانان داير 8 دراهم الثمن الأدنى و11 الثمن الأقصى، البنان دالبلاد 4 دراهم فالثمن الأدنى و7 دراهم فالثمن الأقصى، الليمون 2 دراهم ونص فالثمن الأدنى و5 دراهم ونص فالثمن الأقصى، والتفاح دالبلاد 4 دراهم الثمن الأدنى و7 دراهم ونص الثمن الأقصى، والتفاح المستورد 6 دراهم ونص الثمن الأدنى و12 درهم ونص الثمن الأقصى، والدلاح 1 درهم ونص أقل ثمن و2.80 دراهم الثمن اللي طالع فيه.
بالنسبة للخضر الأساسية فالثمن ديالها بقى مستقر، وحدد السوق الأثمنة ديالها بالكيلوكَرام ف: ماطيشة 1 درهم و30 سنتيم فالثمن الأدنى و2.50 دراهم فالثمن الأقصى، وخيزو 1 درهم و30 فالثمن الأدنى و1 درهم و80 سنتيم فالثمن الأقصى، البصلة 3 دراهم فالثمن الأدنى و4.50 دراهم فالثمن الأقصى، باطاطا 1 درهم ونص فالثمن الأدنى و2.30 دراهم فالثمن الأقصى، البصلة الخضارية 1 درهم و30 سنتيم فالثمن الأدنى و2.30 فالثمن الأقصى.
أما بالنسبة للخضر لخرى، فالمكور أو الكرومب كيدير 70 سنتيم فالثمن الأدنى و1 درهم و20 سنتيم فالثمن الأقصى، والكَرعة الخضرة كتدير 2.50 دراهم فالثمن الأدنى و4.50 دراهم فالثمن الأقصى، والخيار 2 درهم فالثمن الأدنى و3 دراهم فالثمن الأقصى، والدنجال 2 درهم فالثمن الأدنى و3 دراهم فالثمن الأقصى، والكَرعة الحمرا 2 دراهم فالثمن الأدنى و4 دراهم فالثمن الأقصى.