ها أثمنة الخضر والفواكه واللحم بالجملة فكازا

دار سوق الجملة للفواكه والخضر التابع للمجلس الجماعي لمدينة كازا ليست ديال الأثمنة الخاصة بالمنتوجات الفلاحية اللي كيتباعو بالكَرو، وحدد السقف ديالها والثمن الأدنى، على حساب جودة كل منتوج، وهذشي باش ماتكون حتى شي زيادة فهذ الوقت اللي كاتعرف البلاد حالة طوارئ صحية بسبب فيروس كورونا المستجد.

بالنسبة للخضر الأساسية، حدد السوق الأثمنة ديالها بالكيلوكَرام ف: ماطيشة 1 درهم و20 سنتيم فالثمن الأدنى و2.30 دراهم فالثمن الأقصى، وخيزو 1 درهم و20 سنتيم فالثمن الأدنى و2 دراهم فالثمن الأقصى، البصلة 4 دراهم فالثمن الأدنى و7 دراهم فالثمن الأقصى، باطاطا 1 درهم ونص فالثمن الأدنى و2.30 دراهم فالثمن الأقصى، البصلة الخضارية 1 درهم و20 سنتيم فالثمن الأدنى و2.30 فالثمن الأقصى.
أما بالنسبة للخضر لخرى، فالمكور أو الكرومب كيدير 60 سنتيم فالثمن الأدنى و1 درهم و20 سنتيم فالثمن الأقصى، والكَرعة الخضرة كتدير 2 دراهم ونص فالثمن الأدنى و4 دراهم فالثمن الأقصى، والخيار 1 درهم ونص فالثمن الأدنى و2.30 دراهم فالثمن الأقصى، والدنجال 1 درهم و20 سنتيم فالثمن الأدنى و1 دراهم و80 سنتيم فالثمن الأقصى، والكَرعة الحمرة 3 دراهم فالثمن الأدنى.
أما بخصوص الفواكه، لافوكا كتدير 10 دراهم فالثمن الأدنى و17 فالأقصى، البانان دبرا 8 دراهم الثمن الأدنى و11 الثمن الأقصى، البنان دالبلاد 4 دراهم فالثمن الأدنى و7 دراهم فالثمن الأقصى، الليمون 2 دراهم ونص فالثمن الأدنى، والتفاح دالبلاد 4 دراهم الثمن الأدنى و7 دراهم ونص الثمن الأقصى، والتفاح المستورد 6 دراهم الثمن الأدنى و12 درهم الثمن الأقصى، والفريز 4 دراهم أقل ثمن و6 دراهم الثمن اللي طالع فيه.
السوق كذلك تكلم على الثمن ديال اللحم بالجملة فالباطوار ديال كازا، بالنسبة للحم الغنمي فالثمن ديالو الأدنى هو 54 درهم، والثمن الأقصى 56 درهم، البكَري الثمن ديالو الأدنى هو 57 درهم، والثمن الأقصى 61.