الأثمنة ماتبدلوش بزاف مقارنة مع السيمانة اللي فاتت.. ها ثمن الخضرة والفواكه فسوق الجملة فكازا

دار سوق الجملة للفواكه والخضر التابع للمجلس الجماعي لمدينة كازا، اليوم الأربعاء 22 أبريل، ليست جديدة ديال الأثمنة الخاصة بالمنتوجات الفلاحية اللي كيتباعو بالكَرو لهذ السيمانة، واللي ماعرفاتش تغيير كبير بالمقارنة مع السيمانة اللي فاتت، باستثناء ثمن اللحم.
وكيحدد المجلس الجماعي من خلال هذ الليست اللي اطلعات عليها "كود" السقف ديال الأثمنة والثمن الأدنى، على حساب جودة كل منتوج، وهذشي باش ماتكون حتى شي زيادة فهذ الوقت اللي كاتعرف البلاد حالة طوارئ صحية بسبب فيروس كورونا المستجد.
بالنسبة للخضر الأساسية، حدد السوق الأثمنة ديالها بالكيلوكَرام ف: ماطيشة 1 درهم و30 سنتيم فالثمن الأدنى و2.70 دراهم فالثمن الأقصى، وخيزو 1 درهم و20 سنتيم فالثمن الأدنى و2 دراهم فالثمن الأقصى، البصلة 4 دراهم فالثمن الأدنى و7 دراهم فالثمن الأقصى، باطاطا 1 درهم ونص فالثمن الأدنى و2.30 دراهم فالثمن الأقصى، البصلة الخضارية 1 درهم و20 سنتيم فالثمن الأدنى و2.30 فالثمن الأقصى.
أما بالنسبة للخضر لخرى، فالمكور أو الكرومب كيدير 70 سنتيم فالثمن الأدنى و1 درهم و20 سنتيم فالثمن الأقصى، والكَرعة الخضرة كتدير 2.50 دراهم فالثمن الأدنى و4 دراهم فالثمن الأقصى، والخيار 1 درهم و20 سنتيم فالثمن الأدنى و2 دراهم فالثمن الأقصى، والدنجال 1 درهم و20 سنتيم فالثمن الأدنى و1 دراهم و80 سنتيم فالثمن الأقصى، والكَرعة الحمرة 2.50 دراهم فالثمن الأدنى و5 دراهم فالثمن الأقصى.
أما بخصوص الفواكه، لافوكا كتدير 10 دراهم فالثمن الأدنى و15 فالأقصى، البانان داير 8 دراهم الثمن الأدنى و11 الثمن الأقصى، البنان دالبلاد 4 دراهم فالثمن الأدنى و7 دراهم فالثمن الأقصى، الليمون 2 دراهم ونص فالثمن الأدنى و4 دراهم و80 سنتيم فالثمن الأقصى، والتفاح دالبلاد 4 دراهم الثمن الأدنى و7 دراهم ونص الثمن الأقصى، والتفاح المستورد 6 دراهم الثمن الأدنى و12 درهم الثمن الأقصى، والدلاح 2 دراهم أقل ثمن و3.30 دراهم الثمن اللي طالع فيه.
السوق كذلك تكلم على الثمن ديال اللحم بالجملة فالباطوار ديال كازا، وهو الثمن اللي طلع شوية بالمقارنة مع السيمانة اللي فاتت، بحيت لحم الغنمي ولا يدير فالثمن الأدنى 52 درهم والثمن الأقصى 54 درهم، البكَري الثمن ديالو الأدنى ولا هو 53 درهم، والثمن الأقصى 59 درهم.