ازمة كبيرة خرجات وسبابها اليمين المتطرف ودابا كيفاش غادية دير الرباط! مالين لفريز فالصبليون لحكومتهم: ما محتاجينش 7 الاف مغربية هنا رجعوهم لبلادهم دابا

مالين لفريز فجنوب اسبانيا خرجات خبار مقود اليوم. طلبو سلطات بلادهم ينسقو مع الرباط باش يرجعو بشكل مستعجل 7 الاف مياومة مغربية كتخدم فهاد الفلاحة٬ لبلادهم.
وفق بيان توصلت به "كود" من جمعية أساجا اللي تتجمع المزارعين فحقول الفريز و الفواكه الحمراء، فالموسم الفلاحي ما بقا ليه والو و يسالي و خص السلطات ديال البلدين توجد لعملية ترحيل العاملات بصفة إستعجالية و عطات أنه على أبعد تقدير الموسم الفلاحي غادي يسالي فبداية يونيو او قبل كاع إيلا استمرت موجة الحرارة اللي تتعرفها المنطقة.
ممثلة القطاع أشارت إلى أنها راسلت السلطات الإسبانية بهاد الشأن و طالباتها بالتنسيق مع المغرب باش تبدأ عملية الترحيل. هاد الموقف الجديد ديال القطاع فيه شوية دالإحتيال السياسوي حيت هادي أقل من شهر نفس القطاع دار خرجة إعلامية و قال بأن العاملات غادين يبقاو معززين مكرمين حتى تهدأ الأمور و يتحلو الحدود و اللي ملقاتش خدمة فالمزرعة اللي جات ليها نصيفطوها فين كاينة الخدمة باش متقطعش بيها السبل و قبل منها القطاع كان تيطلب ويزاوك باش العاملات الزراعيات اللي كانو من المقرر يجيو و مقدروش بسبب غلق الحدود، يشوقو كيفاش يديرو ليهم باش يجيبوهم!!!
شنو تبدل إذن؟ الأسبوع الماضي حزب فوكس المتطرف تقدم بمقترح فالبرلمان باش المياومات المغربيات، أييه ذكرهم بالجنسية ديالهم، يتم إعادة توزيعهم على قطاعات فلاحية أو صناعية عندها خصاص فاليد العاملة. "فوكس" وصلات بيه لتهديد النساء اللي ما بغاوش بالطرد الفوري. مقترح فوكس ما عندو حتى شي بصيص من الأمل باش يتقبل و يوافقو عليه النواب الإسبان. غير هو هاد قليب الفيستة ديال القطاع الفلاحي بويلفا باين وراه حسابات سياسية لخدمة مصالح "فوكس خصوصا و أن العالم الفلاحي الإسباني هو مرتع خصب للحزب اليميني المتطرف وكيجيب منو أصوات وبالعرارم.
مطالبة أرباب المزارع الإسبان بالترحيل الفوري للعاملات و هوما عارفين أن هاد المطلب صعيب بل شبه مستحيل فالظروف الحالية هو أيضا ورقة ضغط على الحكومة الإسبانية باش تحطها فموقف حرج و تعايرها بلي مقادراش تفرض على المغرب ترحيل رعاياه كيفما تتنص على ذلك العقود الموقعة بين الطرفين. وهادشي تيخدم مصالح شكون؟ مصالح فوكس طبعا اللي غادي يضرب شلا عصافير بحجيرة وحدة: غادي يرغم العاملات يميشو يخدمو فقطاعات واخا هوما مبغينش و اللي ممكن تكون فظروف جد سيئة و يقوي شعبيتو مع القطاع الفلاحي اللي تيعاني الامرين باش يلقا شكون يجي يجمع ليه محصولو الزراعي اللي ولاد بلادو تعفرو عليه!