الساعة الجديدة. مسؤول حكومي ل”كود”: كاين 4 الايجابيات و3 السلبيات وها هما

قدّم مسؤول حكومي ل”كود”، بعض الخطوط العريضة التي جاء بها مكتب الدراسات الذي قام بالدراسة حول الإبقاء على التوقيت الصيفي. وعرض على “كود” أربع إيجابيات وثلاث سلبيات اللّي جا بيها هاد المرسوم الذي دخل حيّز التنفيذ يوم الأحد 28 أكتوبر الجاري
الإيجابية الأولى اللي كشف عليها المصدر ل”كود” كتعلق بالطاقة. ويقول المصدر الحكومي لكود: “غادي يكون واحد الاقتصاد ديال 84 ميكاوات فوقت الدروة ويلا جمعنا كولشي تقريبا ما بين 800 حتى مليار درهم ديال الاستهلاك فالعام اللي كتربح. ونقدرو نبنيو مستشفى جامعي والكلفة ديال الاستثمار220 مليون درهم”.
والإيجابية الثانية، حسب المصدر الحكومي ل”كود” كتعلق بالجريمة. اعتبر ان هاد التوقيت غادية تقل فيه الجريمة. وفق المصدر نفسه فالجريمة كتكون فالايام العادية فالعشية كثر من الصباح. الشفارة والمشرملين كيستغلو بداية الليل وكيكريسيو. دابا مع هاد التوقيت يشرح مصدر “كود”٬ الناس غادية تخرج من الخدمة والشمش كاينة ويدخلو لديورهم بكري. ووفق هاد التصور الحكومي الجريمة غادية تقل.
وبخصوص الإيجابية الثالثة عندها علاقة بالقطاعات الاقتصادية المرتبطة بمهن العالم والمغرب قرر واحد من المداخيل ديال معالجة إشكالية البطالة هو تعزيز الارتباط بهاد المهن العالمية الصاعدة بحال “الأوفشورينغ” وغيرو. وهاد المهن الآن كاين استثمار كبير تعتبر من بين المداخيل ديال معالجة إشكالية التشغيل . ويلا شدينا غير التكوين المهني راه تجاوز 100 ألف أو 150 ألف تقريبا لي كيقرا تما”. يضيف المصدر الحكومي ل”كود”.
العنصر الرابع والأخير اللّي قدمو مصدر “كود” عندو علاقة بالبيئة. المصدر قال أن “الاستعمال ديال الطاقة الأحفورية غادي يتقلص مع استهلاك ثاني أوكسيد الكربون”
كما قدم المسؤول الحكومي البارز ثلاث سلبيات جاء بهم هاد المرسوم ديال الإبقاء على الساعة الصيفية طيلة السنة، ومن أبرزها “الاستيقاظ المبكر” ديال التلاميذ وهذا مشكل كبير بان للحكومة وغادي تراجع التوقيت المدرسي.
والمشكل الثاني عندو علاقة بالمجال الفلاحي. حيث تقرر باش تبقى الخدمة غادية بالتوقيت الملائم. وبخصوص المشكل الثالث، يضيف المصدر الحكومي، أنه عندو علاقة بالعمال والعاملات فالمعامل لي كيخرجو صباح بكري، مضيفا بالقول: “هدا يقتضي واحد المجهود كبير على مستوى النقل العمومي والإنارة العمومية والأمن العمومي”.
وختم المصدر الحكومي بالتأكيد على أن التوقيت الإداري غادي يتركب مع التوقيت المدرسي وغادي يتراجع داك التوقيت باش يمكن الآباء يديو ولادهوم للمدرسة وغادي ناقشوه الأسبوع الجاي، مبرزا أن التوقيت الإداري كيتعالج عبر مرسوم ديال 2005 ماشي بحال التوقيت المدرسي لي كيقر فيه الوزير الملكف بالقطاع.