ضربوهم بلقرطاس فالليل.. استنكار فالسوشل ميديا بسبب قتل كلاب

بحجة أنهم توصلو بشكايات كثيرة من طرف مواطنين بسبب تكاثر الكلاب فالمنطقة، أقدمت جماعة آزرو على قتل العشرات منها، ليلة لبارح الجمعة، بالقرطاس.
الساكنة ديال آزرو استنكرو هذشي على مواقع التواصل الاجتماعي، وخصوصا "فيسبوك"، وأكدو بللي هذ الكلاب ماكيآديو حتى واحد وماكيشكلو حتى خطر، وبللي قتلهم عمل ماشي إنساني.
مجموعة من جمعيات الرفق بالحيوان حتى هي استنكرات هذ الفعل، وأكدات بللي كيمكن يتم إخصاء الكلاب الضالة أو القيام بحملات لتلقيحها، عوض قتلها بهذ الوحشية.
وكانت الجماعة نشرات إعلان، راج بشكل كبير، كتطمأن فيه ساكنة أزرو إلى سمعو صوت القرطاس، وكتقول بللي هذي غير حملة ديال قتل الكلاب الضالة وصافي.
وتدارت هذ العملية بتنسيق بين الجماعة الحضرية دآزرو، والسلطة المحلية والقوات المساعدة والبوليس، كيف ما تدخلو فيها حتى شركات النظافة والجمعيات البيئية باش يجمعو جثث الكلاب اللي قتلوهم.
ومن المتوقع يكونو حملات أخرى بحال هذي فآزرو فالأسابيع جاية، لكن كيبان بللي الساكنة ماباغيينهاش، وبغاو الجماعة تخلي عليهم الكلاب يعيشو فالتيقار.