شوهة "سلمات أبو البنات" على mbc5.. المسلسل دار ضجة بسباب أخطاء مقودة فالسيناريو والإخراج

مسلسل "سلمات أبو البنات" على mbc5 شوه بينا شوهة كبيرا قدام العادي والبادي، بحكم أن العمل عامر بالأخطاء المورقة وغير منطقية فالسيناريو والإخراج، وكلو تناقضات ومافيهش أدنى درجات الدقة والإبداع.
وكانت الحلقة 20 من المسلسل، اللي دازت لبارح السبت، محط سخرية كبيرة من طرف المتابعين، اللي كشفو هفواتها على موقع التواصل الاجتماعي "فيسبوك" وتساركازماو عليها، وخصوصا فيما يتعلق بمشهد يظهر فيه الممثل ياسين أحجام، اللي مثل دور مدير شركة، ممدد على الارض، بعدما ضرباتو "ثورية" (الممثلة جيهان كيداري) على راسو ضربة خايبة، لكن المشكل فالمشهد هو أن بقعة الدم عوض ما تكون باينة نازلة من راسو، حطوها بعيدة عليه.
"فيسبوك" عمر بمئات البوسطات الساخرة بسبب هذ اللقطة، كاين اللي قال بللي "مابغاش أحجام يوسخ راسو"، وكاين اللي قال بللي "عكَزو يغسلو ليه شعرو وعلى هذشي دارو الدم بعيد عليه"، لكن تساءل البعض "علاش ماياخدوش اللقطة من زاوية كتبين أن الدم نزل منو فعلا ويخرجو من باب واسع".
وكاين مشهد آخر لثورية غير منطقي بالبت والمطلق، ولاحظوه المتابعين، وهو فاش تضربات فكرشها وسال منها دم كثير، لكن واخا هكذاك مشات حضرات خطوبة ختها وعنقاتها وحتى شي حد ما عاق بللي مصابة، بل الأكثر من ذلك مشات دخلات للطواليط باش تخيط الجرح، ورجعات كَلسات بحال إلى حتى شي حاجة ما واقعة.
مشاهد كثيرة ثارت سخرية واستهزاء المتابعين، وهذشي ولد عند البعض شكوك لا يكونو هذ الأخطاء مقصودة من طرف المخرج هشام الجباري باش المسلسل ديالو يدير البوز ويتشهر بشكل كبير، لكن هذ النوع من الألاعيب، سواء كانت مقصودة أو لا، هو استخفاف بذكاء المشاهدين والتنقيص منهم، سيما وأن المسلسل كيدوز فقناة عربية سعودية، وغايسيء لجودة المسلسلات والدراما المغربية أكثر وأكثر.
ومن المحتمل تكون القناة السعودية عندها يد فهذ البلان، باش تدخل فلوس كثر على حساب الإنتاج الفني المغربي، وتسيء ليه وتشوهو.