بعد ما نساليو فيلم هاد الجايحة راه صعيب بزاف نرجعو كيف كنا. واش خاصنا نأجلو انتخابات 2021 ونديرو فهاد الهبة المغربية حكومة كفاءات بصاح لعامين حتى نوقفو على رجلينا

المغرب بعد الجايحة ماشي هو المغرب قبل الجايحة. كلشي غادي يتبدل. الاولويات فالسياسات العمومية. النموذج المجتمعي اللي خاصو يكون عندنا. كاين امور ايجابية وكاين امور سلبية.
الايجابي مرتابط بشكل اساسي اننا نخليو "كورونا فيروس" بعيدة منا. نبقاو فمرحلة الوقاية. تبقى الحالات قليلة ما تفوتش فاقصى تقدير 7 الاف حالة. المهم بعيد على التوقعات ولغة الارقام نخرجو منها مزيانين. هاد الشي مع هاد الهبة المغربية هاد الذكاء المغربي من خلال كاع الاجراءات اللي دارت٬ غادية تخلي المغربي سعيد براسو فخور ببلادو. فهاد اللحظات التاريخية ممكن نديرو قفزة فتاريخ بلادنا.
النظافة فالسواق مع الانضباط مع العطاء مع الانخراط ديال الجميع مع وجه جديد مشرق للمخزن كلشي يمكن يساعدنا نوضو. هاد النوضة هي الجانب السلبي فالجايحة.
ففي تقرير للأمم المتحدة دارتو مع البنك الدولي ونشراه ف"كود"٬ بين ان الاقتصاد المغربي غادي يتراجع. هاد الشي باين. الارقام اللي عطى صعيبة. كيقول باللي الناتج الداخلي الخام غادي ينزل ويوصل إلى 1،5 في المائة بسبب تأثيرات فيروس كورونا على الاقتصاد".
اش كيعني هاد لشي؟ التقرير كيقول باللي 10 مليون مغربي غادي يواجه الفقر وعجز الميزانية غيتجاوز 6 في المائة".
سوق الشغل غادي ياكل لعصا. ممكن يكون المغرب مستقبلا يجلب الاستثمارات الاوربية اللي ما باغياش تبقى مرتبطة بالصين. هاد الازمة غادية تغير كلشي. فهاد الحالة نقدرو نخرجو من هاد الازمة بشوية بشوية.
ولكن باش تخرج خاصك كوموندو واعر فالحكومة ماشي حكومة يرأسها بنعرفة كيقول الناس يسمعو الموسيقى الاندلسية. رئيس حكومة عتابر عقد اجتماع مجلس حكومي عن بعد البارح "انجاز" وباغي يسالي الازمة والوباء بالدعاء.
ادريس لشكر زعيم الاتحاد الاشتراكي قال خلال ندوة بمؤسسة الفقيه التطواني ان الأحزاب والنقابات والهيئات وراء الملك لأننا في حرب واضاف "الفاعل الاساسي هو الدولة ونعتز أن مشروعنا كدولة قوية عادلة نجح في هذا المحك".
دابا مع هاد الهبة المغربية واش ممكن نديرو انتخابات العام الجاي؟ كنظن صحيح. هاد الجايجة عطلات شعائر دينية عند المسلمين والمسيحيين واليهود ما غادياش توحل مع انتخابات. كاين شي رجال اعمال قالو ل"كود" باللي باش المغرب يوقف على رجليه خاصو عامين. اي ان الانتخابات خاصها تأجل لعامين او تدار ويكون اللي كيسير الحكومة خبراء باش يخرجو المغرب من الازمة. يوقفوه على رجليه.
هاد الخبراء يكون عددهم قليل بزاف ما يفوتش 15 وزير ويحضى بثقة فالبرلمان تخليه يخدم فحالة الى بقات الانتخابات فموعدها.
طبعا هاد الشي خاصو يكون بضمانات كبيرة فالحريات. حرية الصحافة وحرية التعبير وحرية الجمعيات المعترف بها دير خدمتها. بلا حرية بلا هاد الضمانات كلشي غادي يبقى ناقص واخا نجحو فيه
هذا رأي ويبقى مطرح للنقاش. القرار بيد كاع لمغاربة وفمقدمتهم الاحزاب السياسية.