لغز لكمايم. كيفاش كتوزع 5.7 مليون كمامة فاليوم وما موجوداش فالسوق. مشكلة الحوانت ولا المواطنين اللي كيخرجو بزاف ولا الوزارة ولا الثقافة ديالنا. وا لمغاربة راه فالصبليون كيفرقها البوليس غير على اللي خدمو راها عملة ناذرة وغالية

اش واقع مع لكمايم؟ علاش الناس كتقلب عليهم وما كتلقاهمش وفنفس الوقت كلشي دايرهم. دابا وفق مصدر من وزارة الصناعة والتجارة راه كتخرج يوميا للمغرب كامل 6.7 مليون كمامة. هاد الشي بلا اللي كيمشيو للمصانع بلا اللي كيمشيو للدولة باجهزتها. فين مشاو هادو.
قبل خاصنا نعرفو شي امور بديهية. راه حالة الطوارئ الصحية كتعني باللي ما يخرج بنادم الا للضرورة وغير واحد فالعائلة. ايلى حيدنا شي 30 بالمائة من لمغاربة اللي كاينين فالعروبيات اللي ما معنيينش بهاد الشي. ساكنين متباعدين وعايشين حياتهم وباش كيمشيو عند الحانوت كيديرو احتياطاتهم٬ ثم درنا كاين 4 مليون واحد مسموح ليه يخرج عند الضرورة باش يجيب لعائلتو شي حاجة وفهاد العدد فيه نقاش لانو منطق الحجر الصحي ما خاصش كل نهار يخرج بنادم. غادية تكون حاجتنا يوميا من الكمامات يالله 3 مليون كمامة او اقل. هنا كاين مشكل فين كيمشي الباقي واش التوزيع فيه مشكل ولا نقاط البيع فيها مشاكل ولا مراقبة السلطات والوزارة اللي فيها خلل.
كان فيديو ديال "كازا 24" من حي مولاي رشيد فكازا سوق عامر كولو. ما يمكنش نمشي فيه. وكاع بنادم داير لكمايم. هادي اولا خرق واضح للقانون وثانيا منين جابو هادو هاد لكمايم. يعني كلشي عندو وكلشي كيتشكى. هادي ما مفهوماش
نقطة اخرى غريبة هو هاداك الطبيب التاجر مول لكلينيك الشفا اسمو التازي بوقاحة قال ليك عطى للنقابة الوطنية للصحافة المغربية 36 الف كمامة. من غير شكون قالها ليك وقول لينا كيفاش شريتيهم. واش من الكمايم المدعومة ولا لكمايم اللي خاصها تمشي لقطاع الصحة. غير هادي راها شوهة وهو باين كيفتاخر.
اللي ما مفهموش هو المغاربة كيتشكاو بزاف على لكمايم. وراه فالصبليون باش سمحو لشي قطاعات تتحرك هاد السيمانا البوليس هو اللي كيوزعهم فابور. كمامة لكل مواطن او جوج. وحدة باش يمشي والثانية باش يرجع. فتركيا دارو نظام اخر معلوماتي. كيرسلو للمواطنين الكود فتلفوناتهم وكيمشيو للصيدليات: 5 كمايم لكل مواطن. لمغاربة عندهم باكية فيها عشرة ويقدرو يشريو اكثر ومقلقين.
راه المغرب واعر فهاد الشي بزاف. راه فرانسا استوردات كمايم جابت احسن فرقة عندها فالامن باش تأمن وصولهم للصبيطارات.
دابا بصاح خاصنا نعرفو فين كاين المشكل. هاد الشي غادي يبدا باش تكون الصرامة بزاف بزاف فالخروج والدخول. من بعدها نعرفو كلشي