اوربيين تحزمو لحكوماتهم. لالمان احتجو: من حقنا نتصابو بكورونا فيروس و200 شكاية ضد الدولة الفرنسية و3 الاف اسباني دار نفس الشي مع حكومتو وبنفس التهمة: قتلتي باواتنا وماواتنا

الاوربيون ناضو لحكوماتهم. بعد ايام من بداية الرفع التدريجي للحجر الصحي بسباب "كورونا فيروس" بدات الاحتجاجات واللجوء للقضاء باش يدعيو حكومتهم.
اولها احتجاج كان فالمانيا. السب اللي فات كانت مظاهرة قدام البوندوستاگ: البرلمان الالماني فبرلين. المتظاهرون احتجو وفيهم ناس من اليمين المتطرف اللي كيآمن بنظرية المؤامرة٬ على ما سموه "القيود المفروضة على الحياة العامة" زمن كورونا فيروس.
البوليس ديالهم شد شي وحدين. واخا المظاهرة كانو فيها شي 50 واحد ولكن ففرانكفورت وصلو ل500 وحتى هما من نفس الطينة: يمين متطرف يؤمن بنظرية المؤامرة.
هادو محيحو وطالبو لالمان يحيدو "لكمايم" وينضمو لمقاومة اجراءات الحكومة وعصيانها. من شعارات هادو ان المواطن الالماني من حقو يتعرض للفيروس. يعني كيطالبو بحق فالاصابة ف"كورونا فيروس".
الاحتجاج ففرانسا واسبانيا مختالف. مشى للقانون. مشى للقضاء. ففرانسا تقدمات 200 شكاية ضد حكومة ادوار فيليب وضد الرئيس ماكرون. تاهموها بالاهمال حتى ماتو عدد كبير. عدد القتلى بحالها بحال اسبانيا تقريبا٬ فاتت 26 الف قتيل٬ غالبيتهم من كبار السن. ولاد هادو هما اللي ناضو دارو شكايات.
فاسبانيا ناضت 3 الاف عائلة اللي مات ليهم باهم او امهم بهاد الفيروس٬ قدمو شكاية ضد حكومة ائتلاف الاشتراكيين واليسار الراديكالي اللي كيسيرها الاشتراكي بيدرو سانشيز. هادو اتاهمو الحكومة بالاهمال. جبدو ليها بحال كيف دار اليمين المتطرف ممثلا ب"ڤوكس"٬ مسيرة 8 مارس فاليوم العالمي للمرأة وعدم قيام اجراءات ضد القادمين من ايطاليا اللي كان بداها الفيروس.
المعركة هنا بدات قضائية ولكن ريحة اليمين المتطرف بحال المانيا عاطية.