سكوب. المغرب غادي يصدر لكمايم لاوربا فاول ماي وها الانواع اللي غاديين يتصدرو وها البلدان اللي طالباهم

علمت "كود" ان المغرب غادي يبدا تصدير الكمايم السيمانا الجاية. القرار وفق مصدر "كود" تخاد بعد ما وصلنا تقريبا ل8 مليون كمامة فاليوم موجهة للمغاربة. انتاج كافي لكاع لمغاربة اللي مسموح ليهم يخرجو للزنقة.
وفق مصدر "كود" فان 17 مصنع اللي كيديرو كاع انواع الكمايم بدات تصنيع انواع اخرى. وفق مصدر "كود" غادي نبداو تصنيع مليون كمامة يوميا من الثوب اي يمكن للمستعمل يصبنها ويعاود يستعملها.
كاين نوع اخر من الكمامات بدا تصنيعها المغرب وغادي يرفع الوتيرة وهي هادوك الكاسك اللي كيديروه على لوجه: فيزيار. كيستعملوهم ناس الصحة وفالمتاجر لكبيرة واللي خدامين فالصيدليات.... اي اللي محتاج يحمي راسو لمرة طويلة. المغرب كينتج دابا 75 الف ماسك فاليوم وغادي يولي الانتاج السيمانا الجاية 125 الف ماسك من هاد النوع
فرانسا واسبانيا وايطاليا والمانيا هي الاسواق اللولى اللي غاديين نصدرو ليهم لكمايم. اوربا كلها بدات قرارات او غادية لهاد القرارات ديال الزامية لكمايم وغير انتاجهم قليل وما كيكفيش السوق. المغرب يقدر يبدا التصدير فبداية ماي لهاد الدول وفق توقعات مصدر "كود".
طبعا غاديين يكونو كمايم بحال اللي عندنا وديال الثوب والماسكات.