أطباء كيطالبو المغاربة باش يتبرعو بالكمامات اللي خداو.. وطبيبة ل"كود": عندنا فالسبيطار كمية قليلة موحال تكفينا باش نواجهو "كورونا" فالمراحل جاية

طلبو أطباء مغاربة من المواطنين اللي شراو كمية كبيرة من الكمامات من نوع FPP2 يتضامنو مع العاملين فقطاع الصحي ويرجعوها ليهم، بحكم أن عددها صبح قليل بزاف، وماغايكفيش فمراحل تفشي فيروس "كورونا" المستجد فالمستقبل القريب.
الأطباء أكدو، فبوسطات كثيرة على مواقع التواصل الاجتماعي، بللي ماشي غير المستشفى الجامعي اللي كيعاني من هذ النقص، لكن جميع المستشفيات الأخرى فالمغرب كامل، وخصوصا منها اللي كاينة فالمدن الصغار.
السبيطارات خواو من الكمامات
واحد الطبيبة رغبات الناس، فتدوينة ليها على "فيسبوك"، باش يرجعو لكمامات، وقالت: "عفاكم لي عندو الكمامات FPP2 يديهم للسبيطارات راه مكاينينش، وإلى تعادا لينا الطاقم الطبي غادي تكون كارثة بكل المقاييس حيت وخا تكون داير جميع الوسائل الوقائية الممكنة وتمرض بشي مرض يستدعي التدخل الاستعجالي وتمشي للسبيطار تقدر تصدق هاز منو هو نيت "كورونا" ومدوزها للناس لي عزاز عليك".
طبيب آخر قال، فتدوينة ليه تكلم على قلة الكمامات فالمغرب، وقال بللي "من الضروري، ولو من باب الاحتياط، توفير ما يكفي من الأقنعة على الأقل ولو في القطاع الصحي، حيت حتى شي حد ما كايعرف نوايا الفيروس".
فتواصل "كود" مع طبيبة فقسم المستعجلات فمراكش، قالت بللي استقبلو 7 ديال المرضى المصابين فيروس "كورونا" ، وكاينين حالات كثيرة مشتبه فإصابتها وكتخضع للحجر الصحي، من ضمهم أطباء وممرضين.
وقالت بللي ففرنسا وإسبانيا واخا كيتعاداو الأطباء بالفيروس، إلى ماكانتش الحالة ديالهم حرجة كيكملو العمل ديالهم عادي حيث محتاجينهم ف العمل وحيث ماكايعاديوش بالفيروس اللي فيهم بحكم أنهم لابسين اللباس الواقي من العدوى وواضعين الكمامات، "لكن حنا مادام مكانتوفروش على عدد كبير من هذ لي ماسك، كانقومو بالعزل ديالهم، وإلى استمرينا هكذا غانعزلو جميع الأطباء وماغانستافدوش من الخدمات ديالهم"، كيف قالت.
وزادت كتقول: "خاصنا نجهزوه للظرفية اللي جاية، دابا كاين خطر انتقال العدوى، لكن فالمستقبل غايقد يكون تفشي للفيروس، ولكن الاطباء فالمغرب الآن خدامين بأقل قدر كاين من وسائل الحماية، فما بالكم فالمراحل الجاية".
السطوك العالمي دالكمامات قرب يخوا.. والفلوس مكافيينش
وأكدات بللي السطوك ديال الماسكات عالميا تسالا، حيت جميع الدول طالباهوم ووخا الصين مزال كتصنع فيهم، و"بالتالي فالفلوس مايمكن تدير والو باش يجيونا ماسكات جداد إلى مارجعوهاش المواطنين اللي خداوها بكميات كبيرة".
"الفلوس واخا كاينة لكن مكافياش، حنا طلقنا عبر مواقع التواصل الاجتماعي دعوة للتبرع ، الناس اللي غير كالسين فالدار راه مغايحتاجوهومش، وكاين ليبارا فارماسي اللي شاريينهم باش يقلبو فيهم البيع ويبيعو الكمامة الواحدة ب100 درهم، فالوقت اللي كانت كتدير غير 2 دراهم".
وقالت بللي الماسك خصو يتلبس 4 ساعات ويتبدل، لكن بزاف دالأطباء كيلبسوه أسبوع كامل بسبب قلة هذ الماسكات، "وهكذا ممكن تولي أكثر خطورة، لأن اللي مصاب بكورونا غايولي ينقل الفيروس عن طريقها للناس".