خاص. خت منصف السلاوي اللّي عينو ترامب على رأس لجنة لتطوير لقاح كورونا ل"كود": خويا مغربي من القلب وما وصل إليه افتخار للمغاربة وراه عاون بلادو

منذ تعيين العالم المغربي، منصف السلاوي، من قبل الرئيس الأميركي، دونالد ترامب، على رأس لجنة البيت الأبيض لتطوير لقاح ضد فيروس كورونا المستجد، ناضو شي وحدين فيهوم لفهامة بزاف كيقوليك أن منصف اسمح فبلادو وكاين اللّي قال أمازيغي وشي قال عربي وشي هدر على هجرة الأدمغة.
"كود" هضرات مع شقيقة العالم المغربي منصف السلاوي، ورفضات تجاوب على هادشي اللّي كيتقال فحقو. هادية السلاوي قالت ل"كود" أن خوها مغربي من القلب، مبرزة أن تعيينه على رأس مبادرة البيت الأبيض لتطوير لقاح ضد "كورونا" هو افتخار لجميع المغاربة ولعائته.
وأضافت هادية السلاوي، وهي أستاذة جامعية، قائلة: "كل واحد يلغي بلغاه، والمهم والمراد من تعيين أخي باش يطور لقاح ضد الفيروس هو يخدم ماشي حاجة أخرى، مشيرة إلى أن خوها خدام ومعندوش الوقت، ولا تتواصل عائلته معه بشكل نهائي من قوة مشغول بزاف، وهو براسو كيطلب منهوم ميتواصلوش معاه فهاد الوقت.
وبخصوص واش يقدر يعاون بلادو للاستفادة من تجربته فهاد المجال، أضافت هادية في تصريح ل"كود": "منصف كان ديما كيعاون بلادو، ودار محاضرات وهضر بزاف فالمغرب، لكن باش نقولو دبا أنه غادي يعاون المغرب في العثور على اللقاح ضد "كورونا" راه صعيب شويا، والمسألة سياسية في الوقت الراهن، وأنا معارفة والو، ومنقدروش نعرفو حتى شي حاجة فهاد الساعة".