اجيو نشوفو الصبليون كيفاش تعاملو مع ناسهم اللي خرقو حالة الطوارئ. مليون دعيرة اللي كتوصل حتى 60 الف اورو و8 الاف واحد تشد وفالمغرب 65 الف قضية و3 الاف مشدود

فالمغرب كاين نقاش حقوقي صحي علي عدد المعتقلين فهاد الجايحة. واش كانت اعتقالات عشوائية ولا اللا واش حتارمات القانون ولا للا. النيابة العامة فاخر بيان ليها فيه حصيلة هاد الشي دار نهار 8 ماي٬ اي هادي 12 يوم. العدد اكيد غادي يكون طلع شوية. فهاد البيان فيه انو تم تحريك المتابعة القضائية ل65 الف و352 شخص خرقو حالة الطوارى الصحة وباللي 3106 احيلو فحالة اعتقال اي ان النسبة تقول النيابة العامة لا تتجاوز 4.75 بالمائة من مجموع المتابعين اوضاف البيان انو في اطار التصدي للاخبار الزائفة تم فتح 109 بحثا قضائيا وتحريك المتابعة فحق 80 شخصا.
واش هاد العدد كبير مقارنة مع دولة اوربية فيها ديموقراطية احسن منا اللي هي اسبانيا. فالجارة الشمالية اللي كان فيها حالة الطوارئ ديال بصاح. منطقي حقاش فات عدد المصابين 200 الف وعدد القتلى 27 الف. هنا الاحصائيات الرسمية حتى اليوم الاربعاء 20 ماي 2020 ان عدد اللي حصلو وزممو ليهم مليون و5 الاف و187 صبليوني من بلاد فيها 47 مليون نفس. البوليس المحلي=حقاش عندهم البوليس الوطني وكل جهة فيها بوليس محلي= دار 366.051 شكاية ولگوارديا سيڤيل =الحرس المدني اللي كيشبه عندها للجدارمية= زمم 266.974 دعيرة والبوليس الوطني =اللي كيخدم فكاع الجهات= زمم 287754 ذعيرة.
طبعا هادو كيخلصو على حساب نوعية الذعيرة. كاين اللي كتوصل حتى ل60 مليون سنتيم وكاين اللي كتقرب ل6 مليون سنتيم. ولكن كاين اللي كيشدوه
فقضية الاعتقال وصل عددهم فاسبانيا 8372. البوليس الوطني شد 3.751 والبوليس المحلي شد 2.512 والباقي شدهم الحرس المدني.
طبعا هنا ماشي للمقارنة. حقاش لا مقارنة مع وجود الفارق. حنا يالله قربنا ل7 الاف حالة اصابة فكورونا فيروس. القتلى مازال ما وصلناش ل200. جهات شحال من يوم ما فيها والو. يعني ما ضرباتش عندنا هاد الجايحة كيف كرفصات الصبليون.