كيفاش كيضحكو اطباء فالقطاع الخاص علينا وعلى الدولة. 70 بالمائة منهم كيخلصو فالعام قل مليون سنتيم واطباء القطاع العام كيخلصو 10 المرات كثر منهم واخا كيربحو قل منهم بزاف

دابا ادارة الضرائب ناضت لقطاعات كثيرة فالمغرب. دازت لاطباء القطاع الخاص وغادية دوز للمحامين وتكمل طريقها لمهن حرة اخرى ما كتخلص والو للضريبة وفيها بعضهم ملايرية كبار ماشي غير مرفحين.
فالمغرب كاين 12 الف طبيب فالقطاع الخاص ومديرية الضرائب اكتاشفت ان شي 30 بالمائة من هادو كيخلصو 3 المليون سنتيم سنويا فيما 70 بالمائة كيخلصو غير مليون فالعام. باش تفهمو مزيان. اطباء القطاع العام اللي كيتم الاقتطاع ليهم من الجدر ديال الصالير كيخلصو 3 المرات اكثر للدولة فالضرائب من هادوك الاطباء اللي كيخلصو 3 مليون سنتيم واطباء القطاع الشبه عمومي كمصحات الضمان الاجتماعي كيؤديو ما بين 15 مليون سنتيم الى 30 مليون سنتيم سنويا للدولة اي كيؤديه عشرة المرات اكثر مما يؤديه 70 بالمائة من اطباء القطاع الخاص.
دابا هادو غير اطباء القطاع الخاص ماشي صحاب المصحات هاداك عالام اخر خاص تحقق فيه الاف بي اي ديالنا ماشي مديرية الضرائب.
وفق عضو قيادي في نقابة اطباء القطاع الخاص ل”كود” فانه ما خاصش التعميم “كاين اطباء ما عندهمش حتى علاقة بالضريبة وكاين فئة من الاطباء محترمة مواطنة” ونبه الى تجنب العقاب الجماعي للمهنة من خلال المراجعة الضريبية. المصدر قال انه لا يعقل ان يؤدي بعض الاطباء المتخصصين 12 الف درهم سنويا فالضريبة٬ لكنه شدد على ان الطبيب خاصو يكون عندو تغطية صحية وتقاعد ويوفرو ليه تعليم لابناؤو حقاش هاد الشي فين كيمشيو الضرائب