واش لارام غادية تولي من الماضي؟ مديرها العام: كنعيشو اكبر ازمة فتاريخنا وكنخسرو يوميا 50 مليون درهم وخاصنا على الاقل 3 سنين باش نتگعدو ولكن ايلى كان هاد الشي

الرئيس المدير العام ل "لارام" حميد عدو دار واحد الرسالة فيها بوح كبير على وضعية الشركة. الرسالة اللي عند "كود" نسخة منها٬ هدر على كيفاش كتعيش هاد الشركة واش من افاق عندها باش تخرج من الازمة.
كاين تشاؤم وكاين تفاؤم. تشاؤم حقاش مستقبل الوضعية الوبائية اللي تسببات فهاد الشي ما معروفش. واخا كاينات شركات طيران بحال "الاماراتية" و"التركية" غادية تبدا شي رحلات السيمانا الجاية.
عدو قال فالرسالة اللي عند "كود" نسخة منها٬ ان خسائر الشركة من نهار تسدات الحدود وسط مارس الى اليوم كبيرة بزاف. كل نهار كتخسر "لارام" وفق المدير العام٬ 50 مليون درهم. هاد الشي غادي يطول. "لارام" موحالش تفتح الا فشهر يونيو. وهاد الشي مرتابط بالوضعية الوبائية عندنا وعند العالم.
المدير العام ذكر باللي الخسائر عامة على شركات الطيران اللي خسر فالعالم 314 مليار دولار فيها 6 مليار دولار فافريقيا بوحدها. هاد الشي عندو تأثير علي الخدمة. 25 مليون منصب شغل مهدد.
اذن الضربة خايبة فالمغرب اللي خلاتو يقول "كنعيشو اصعب ازمة فتاريخ هاد الشركة" ومحتاجة الى توفرات شروط كثيرة "علي الاقل 36 شهر" باش ترجع لارام كيف كانت ف2019.
الرئيس المدير العام هدر على كيفاش تخرج الشركة من الازمة. هدرة عامة. حقاش السيناريوهات اكد غادية تكون بعد تشاور مع كاع المتدخلين والشركاء.
قال باللي "خاص كل واحد منا يلعب دور باش نتجاوزر هاد الازمة". "كلشي يدافع على المصالح المشتركة والحفاظ على الخدمة". هادا هو الحل الوحيد عندو "اللي يخلينا نخرجو بخسائر اقل". "نتاحدو باش نخرجو من الازمة" و"ما خاصش نربعو يدينا"
عدو قال باللي "الطريق طويلة وعامرة بالمطبات هاد الشي علاش خاصنا تضحيات كبيرة" بلا ما يعطي شروح كثيرة على هاد التضحيات. باينة الصالير
غير هو هدر على "خاصنا نبدلو طريقة خدمتنا ونراجعو السومة ديالو تكون مصاريفنا القارة قوية ودايمة باش نكونو اكثر تنافسية" وباللي "محتاجين لدعم باش نعاودو اقلاع انشطتنا ولكن هاد الشي محتاج دعم مادي
خدامين مع كلشي باش نوصلو لهاد الحل" وباللي "كاينين سيناريوهات كثيرة على الطابلة لهاد الروديماراج" وباللي "ما يمكن نجحو الا ايلى كنا فرقة وحدة متراصة ومتضامنة"
اللي ما هدرش عليه هو صالير ليبيلوط. كاين اللي كيشد 15 مليون سنتيم. من حقهم حقاش السوق عطاتو ليهم٬ غير ما ضامنوش مع المغرب فهاد الجايحة بحال عدد من القطاعات. عطاو فحدود 6 الاف درهم من صاليرهم فصندوق التضامن ضد الجايحة وما سبقوش هاد الرسالة ودارو شي جيست كيقدمو فيه مصالح شركتهم ومصالح بلادهم على مصالحهم الخاصة. ياخدو قدوة من لبيلوط ف"لوفتانزا" اللي هما قررو ينقصو 45 بالمائة من صاليرهم.
اش فيها ايلى هادو مع هاد الازمة يگولو للشركة: نقصي لينا 50 بالمائة لمدة 36 اشهر حتى تتگعد الشركة ورجعو لينا الراتب كيف كان. ولا كانت الامور مزيانة فالمستقبل ياخدو بريمات مزيانين كاشادة بهاد الخدمة.
هادو عايشين فعالمهم. .كيهمهم مصالحهم. ممكن يبانو فيهم وحدين تتحرك فيهم روح التضامن. كلشي ممكن