إشهار "قطع الكار من الدار" ديال شركة مركوب منوض الصداع فزمان كورونا.. ومسؤول تجاري ل"كود": هذاك سلوكَون إشهاري قديم.. وغرضنا التعريف بخدماتنا اللي غاتكون متوفرة بعد الحجر الصحي

جدل كبير خلقو الإشهار اللي كيدوز فالقنوات للعمومية مع الفطور ديال شركة markoub.ma، اللي كتحث فيه الناس باش "يقطعو الكار من الدار"، فالوقت اللي البلاد كتعرف حالة ديال الطوارئ الصحية بسبب فيروس كورونا المستجد، والسفر بين المدن صبح ممنوع إلا للضرورة القصوى.
كاين سخرية كبيرة على مواقع التواصل الاجتماعي على قبل هذ الإشهار، بزاف دالناس أكدو أنه مابغاش يتفهم ليهم حيت كيجمع بين جوج دالمتناقضات، الكَلاس فالدار والسفر، وحدين خرين كيشوفو فيه خرق حقيقي للحجر الصحي، ودعوة للخرق ديالو بالسفر.
لكن بمجرد تواصل "كود" مع الشركة فواتساب، توصلات برسالة إلكترونية آلية كتقول فيها أن السفر ماكاينش، والكيران ماخدامينش، وحتى لمن بعد الحجر الصحي عاد ممكن تكون شي حاجة.
"كود" تواصلات مع ياسين حافة، المسؤول التجاري المكلف باللوجيستيك ديال الشركة، باش يعطي توضيحات على سبب بث الإشهار فهذ التوقيت واختيار عبارة "قطع الكار من الدار"، وقال أن هذيك العبارة "سلوكَون بيبليسيتير" كتعتمدو الشركة من نهار بدات هذي ثلث سنين، باش تعرف بالخدمة ديالها للناس. وتبين ليهم بللي بإمكانهم يقطعو الكار بسهولة من ديورهم.
وأكد حافة أن الخدمة دابا متوقفة والكيران ماخدامينش، والشركة بحالها بحال جميع الشركات الأخرى تقدمات بطلب عرض إشهارها فهذ الفترة مع الفطور فرمضان، بحكم أن هذ التوقيت هو التوقيت المناسب اللي كايتجمعو فيه الناس قدام التلفزة، وطلبها تقبل.
والغاية من الإشهار هو التعريف بالشركة وخدماتها لما بعد الحجر الصحي "وكيف شفتو الإشهار قصير بزاف ومافيه حتى دعوة للسفر أو الخروج، حيت أصلا كلشي حابس"، على حساب هضرة حافة.