علاش كتزيدو تبهدلو السي بنعرفة. جايبينو للبرلمان بعد ما داز لفتيت والتوفيق وسالاو كاع اللي يقدر يهدر عليه

واخا جلسة دستورية ديال رئيس الحكومة فالبرلمان بغرفتيه وهي "الجلسة الشهرية" فما بقى فيها ما يدار. داك العبارة ديال "الاجابة على الاسئلة الشفهية المتعلقة بالسياسة العامة طبقا للفصل 100 من الدستور" ولات غير هدرة كتزيد تشوه فبنعرفة
اليوم الثلاث 16 يونيو مع الثلاثة غادي يكون فمجلس المستشارين باش يهدر على "سياسة الحكومة لما بعد رفع الحجر الصحي: اية خطة اقلاع اقتصادي لمعالجة الاثار الاجتماعية للازمة". دابا انتوما غاديين تصدقو باللي هاد السيد عارف حتى وقتاش غاديين يرجعو لمغاربة اللي حصلو برا كاملين باقي ليه غير يملك خطة اقلاع اقتصادي
من نهار بدات هاد الجايحة وهو محطوط كي شي مخدة فصالون مغربي. ما كيتحركش ولا تحرك باش يزبلها. فين ما جا يهدر يقودها. ما عمرو كان لا مقنع لا المواطن حس بالامان باش كيهدر لا جاب شي حاجة جديدة.
قال للمغاربة غاديين يبقاو فالحجر بعد رمضان كذبو وزيرو فالمالية والاقتصاد وقال غاديين تخرجو بعد العيد باش الاقتصاد يتحرك. قال غادي يكون تقسيم واحد وجوج وووو جا وزير الداخلية والصحة قالو باللي غادي يوقع رفع اكثر السيمانا الجاية.
جا باش يهدر على الاقتصاد سبقو وزير المالية وعطى كلشي. جا يهدر على الصناعة سبقو وزيرو فالقطاع وهدر على اش دار فتصدير الكمامات. جا يهدر على التعليم سبقو وزير التعليم وهدر على قطاعو. نفس الشي دار فوزارات كثيرة.
السياحة اللي ممكن يهدر عليها ما فاهم فيها والو والوزيرة ديالو سبق ليها هدرات على هاد الشي.
دابا هادا كرئيس حكومة باش كيحس. باش كيحسو صحابو فالحزب اللي ساهمو فالانقلاب على بنكيران. ها انتوما كتحصدو اش زرعو. وتمتعو بيه وبالتبهديل اللي دايرين ليه والفقصة اللي دايرها للمغاربة فالتلفزة فالبرلمان