حالة الطوارئ الصحية زمن "كورونا فيروس" ضربات حقوق الانسان. شكون يوقف هاد المهازل اللي وصلات حتى ضرب لمخازنية لنائب وكيل الملك فطنجة

البارح تعداو مخازنية على نائب وكيل الملك. حلقة من حلقات الاعتداء على المواطنين فحالة الحجر الصحي. اعتداءات وقعات وانزلاقات كانت. علاش وصلنا لهاد الشي. وصلنا ليه لانو كان تساهل. شفنا قايد ضرب صحافيين من قناة "الامازيغية" بتيفلت وما وقعش الاحتجاجات بحجم الاعتداء. قبل هاد الشي كانت اعتداءات اكثر.
اعتداء البارح فرش كلشي. هاد الشي اللي كيفسر المحاولات البئيسة ديال نشر فيديو بغاو كيكذبو نائب وكيل الملك. فيديو كيروج باش يبررو الاعتداء كيف ما كان. هاد الشي خطير بزاف بزاف
شهادة نائب وكيل الملك فيها كلشي. صوتو فيه احساس بالحگرة. ساهل نتاكدو من كاع التفاصيل اللي قالها. راه كان القايد ورجل الامن جاو.
هاد المحاولات ديال ما يبقاش النقاش هي الاعتداءات خطيرة. ماليها خايفين من المنظمات الحقوقية اللي شحال من مرة وهي كتهدر على هاد الشي. على المقررة الاممية المكلفة بحقوق الانسان هدرات على هاد الشي وحذرات منو.
المجلس الوطني لحقوق الانسان ما دايرش خدمتو. ذبل من نهار جابو ليه امينة بوعياش. ولي النقاش ايديولوجي اكثر منو حقوقي. كيدير حقوق الانسان غير الوقت اللي كيتماشى مع ايديولوجيتها.
دابا ممثل القضاء تعرض للاهانة. ما حتارموش حتى مخزني. خاصنا قبل ما يتعاقب بالقانون هاد المخزني يقول لينا علاش تصرف بحال هاكا. شكون عملو ما يحتارمش لا وكيل الملك لا نائبو. كيفاش وصلنا لهاد الدرجة الصفر من احترام المواطنين.
دابا كون مواطن عادي اش كانو غاديين يديرو ليه. يوميا كاينين حالات اعتداء رجال السلطة شبيهة واخطر من اللي تعرض ليه هاد نائب وكيل الملك.
هاد التربية على الاعتداء على حقوق الانسان قبل بعض رجال السلطة غادي يدير احقاد وكيضرب كلشي اللي كيديرو الدولة. البوليس هو الجهاز الوحيد اللي فين ما تورط شي فرد منو كتحرك ادارتو بعد التحري لادانتو. باقي الاجهزة ماشي اولويتهم حقوق الانسان. حتى وزير الداخلية لفتيت عبد الوافي قال فالبرلمان باللي رجال السلطة تحت الضغط وواضاف ما معناه باللي من بعد ما تفوت هاد الجايحة نتحاسبو. هادا خطأ يتحمله بالاساس السياسي وخاصة المعارضة. كانت متواطئة مع الحكومة فهاد الخروقات.
خاص محاسبة كل واحد دار تصرف يسيء للمواطن. اللي كيخرق القانون خاصو احترام ما يمكنش لشي حد يضربو او يسبو. ما عند حتى حق يدير هاد التصرفات. راه بهاد التصرفات كنريبو امور كثيرة درنا وقت طويل باش بنيناها