نايضة فاذاعة "ام اف ام". صحافيين كيتشكاو من الاقتطاع

العاملون في إذاعة "ام اف ام"، من صحافيين منشطين ومعاهم باقي مستخدمي المجموعة، اللي كيصدر مجلة "لالة فاطمة" ومجلة "تشالنج" و"vh"، تفاجؤو اليوم الجمعة بورقة فرقاتها عليهم الموارد البشرية كتطالبهم فيها الإدارة بتوقيع كيتنازلو فيه على جزء من راتبهم الشهري لأجل غير محدد، واللي كان سبق للشركة واقتاطعاتو هادي شهرين دون إخبار.
هاد الورقة اللي اللي تفرقات فيها خرق واضح وصريح للمادة 185 من مدونة الشغل، حيت ما فيها لا تحديد المدة، لا اتفاق مع ممثل الأجراء لا والو، واللي فتا هاد الرأي على الإدارة راه باغي يغرق ليها الشقف.
وهاد المدونة راه كتقول: "إذا كان التقليص من مدة الشغل العادية تزيد مدته عن الفترة المحددة في الفقرة الأولى أعلاه، وجب الاتفاق بين المشغل ومندوبي الأجراء والممثلين النقابيين بالمقاولة عند وجودهم حول الفترة التي سيستغرقها هذا التقليص". يعني ماشي تجي تفرض على الناس شروطك.
الاقتطاعات حسب مصدر "كود" تراوحت نسبتها بين 10 و 30 فالمائة، زيد عليها الادارة في هاد الوقت رفضات تعطي الوثائق الادارية للصحافيين والتقنيين حيت عرفو راسهم عاورينها.
اما فيما يخص المتعاونين من صحافيين وتقنيين فاصحاب الرواتب الكبيرة نقصو لهم 50% واصحاب الرواتب الصغيرة 3000 و 3500 درهم نقصو لهم 10%.
الصحافيين العاملين ف"ام اف ام"، بحال باقي الاذاعات اللي بزاف دارو البث من ديورهم، بقاو مواظبين على تنشيط برامجهم من مقر العمل وما نقصوش من ساعات الخدمة كيف قالو هما.
هاد الناس تشكاو من حاجة اخرى وهو ان الاذاعة نقصات ليهم من أيام العمل المصرح بها للصندوق الوطني للضمان الاجتماعي.