عودة لمغاربة من برا. علاش "حبانا" الله بوزير خارجية غبي. جابو الرمضاني وعطاه يصماتشي وزگلها

وزير خارجيتنا ناصر بوريطة ماشي ضعيف وا غبي. اللي تبع حوارو البارح مع "ميد راديو" وخرجاتو فالاعلام بعد اتصالو هو بعدد من الصحافيين كيف مولف كيدير٬ بان هاد الغباء.
كيفاش وصلنا لهاد المستوى. وزير ما قادرش يدير بيان واضح على قضية فتح الحدود استثناء لعودة لمغاربة واللي مقيمين فالمغرب من 15 من هاد الشهر. بعد البيان الفضيحة اللي هو مسؤول عليه٬ خرجو وزرا كيشرحو وما كفاش شرحهم جات الحكومة فاجتماعها الاسبوعي ودارت بيان اخر وجا هو البارح عند رضوان الرمضاني فبرنامج خاص باش يوضح. والو باقي داك الشي غامض.
اش قال هاد بوريطة؟ قال باللي هاد العملية كيتعلق غير بفتح الحدود بشكل إستثنائي، وماشي فتح حدود كلي. ما جاوبش على وقتاش تفتح هاد الحدود. وقال باللي القرار خاص تيست بي سي ار عندو 48 ساعة والاختبار السيرولوجي جديد ماشي قديم.
وبللي لمغاربة ما يمكنش ليهم يخرجو الا باسباب عندها علاقة بالقراءة او الصحة وبللي الخطوط الملكية المغربية وطيران العربية مستعدات للعملية من السيمانا الجاية للعملية واكد باللي غادي يتم تكييف الرحلات وعددها حسب الوضع، وممكن يترفع العدد او يتقلص على حساب هاد العرض والطلب
اللي سمع الحوار يعرف ان رضوان الرمضاني اللي كيكون ذكي ومستفز فاسئلتو ديما٬ بان فحوارو مع هاد الوزير الغبي ماشي ذكي. عنداك غير يعاديه وصافي.
ما جاب والو. ما هدرش على امور واضحة وعملية. راه التيست فدول ما كاينش. راه 48 ساعة خالقة مشكل. راه تحديد غير مدن معينة فكل دولة وماشي كاع الدول٬ مشكلة حقيقية. راه الثمن ديال التيست غالي. راه راه راه.