نايضة بزاف على قرار رئيس تركيا ادوغان تحويل متحف ايا صوفيا لجامع. روسيا واليونان وميريكان وفرانسا حدراتو من هاد التصرف واليونسكو رفضات القرار والمجلس العالمي للكنائس =فيه 350 كنيسة= قال فرسالة لرئيس تركيا باللي مستاء وحزين على هاد الشي. اردوغان رد عليهم وقال باللي هاد الشي داخل فالحقوق السيادية لتركيا. يعني ما مسوقش ليكم. اردوغان هدر البارح على اطماعو التوسعية وقال باللي بلادو خدات القرار ماشي على اش قالو ليها لخراين ولكن على حقوقنا كيف درنا فسوريا وليبيا واي بلد اخر" يعني كيعتابر دخلو لسوريا وليبيا حق او استرجاع لدول كانت تحت السيطرة العثمانية. وكان مجلس الدولة وافق على طلبات قدماتها منظمات باش تبطل قرار حكومي كيعود لحكومة اتاتورك 1934 وفيه ولات هاد المعلمة اللي فلائحة التراث العالمي متحف. ايا صوفيا بناوها البيزنطيون فالقرن 6 وفيها كان فينما يطلع شي امبراطور يتوجوه. بعد عشرات من المحاولات دامت سنوات استولى العثمانيون على القسطنطينية ف1453 ورجعوها عاصمتهم وبدلو ليها الاسم: اسطمبول اتاتورك قرر يهديها للانسانية على هاد الشي دارها متحف. اردوغان استعملها ورقة باش يضمن اصوات القوميين المتطرفين ورجعها جامع فمدينة فقد حزبو عموديتها وشعبيتو غادية وتتراجع.