خبار زوين. واش الحدود المغربية غادية تفتح ف10 شتنبر. هادو ولاو يدخلو عندنا غير بدعوة

واش المغرب غادي يفتح حدودو يوم 10 شتنبر؟ دابا تمديد حالة الطوارئ الصحية غادي يسالي نهار 09 شتنبر واللي من التدابير ديالو استمرار اغلاق الحدود.
علاش قلنا كاينة امكانية تفتح الحدود؟ على رسالة داخلية دارها شكيب لعلج رئيس الباطرونا لباقي الاعضاء. فيها انو من 10 شتنبر يمكن لكاع الشركات اللي محتاجة لاطر اجنبية وخبراء وتقنيين يجيو من الخارج يرسلو ليهم دعوة من الشركة فيها المعلومات المعروفة الى هاد الخبير الاجنبي او التقني باسمو ورقم باسبورو ووقتاش جاي للمغرب. هادي كافية ما بقاتش الحاجة لرخصة من وزارة الخارجية كيف معمول بيها دابا. طبعا هادوك التيست بجوج غاديين يبقاو مطلوبين لاي واحد يدخل للتراب المغربي.
موريتانيا البارح علنات باللي غادية تفتح حدودها. تونس كانت فتحاتها قبل وحافظات على الاجراءات الصارمة اللي بغى يدخل. خاص يكون عندو تيست بي سي ار". هادا حتى هو معمول بيه فالمغرب وزايدينو تيست سيرولوجي.
دابا واش غادية تفتح الحدود البحرية ولا اللا؟ هادا امر اخر. البارح وزير الخارجية تصل بنظيرتو الاسبانية. قالو هدرو على العلاقات الثنائية وامور اخرى. يمكن هاد الموضوع ناقشوه