سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
وقتاش يتحاسب وزير الصحة بعد ما يطيروه. كيفاش عندنا 33 قتيل فيوم وباقيين كنديرو 20 الف تيست بحال نهار ما كان كتسجل حتى حالة. عدد الاصابات راها كبيرة بزاف
واش خاص محاكمة وزير الصحة خالد ايت الطالب علي كاع القتلى اللي كيطيحو يوميا بسباب كورونا فيروس؟ هادا نقاش يحسمو فيه ناس القانون وصحاب السياسة اللي فالمعارضة وناعسين. اللي اكيد ان هاد الوزير مع رئيسو بنعرفة خاصهم يتحاسبو. علاش؟ على التدبير الكارثي لهاد الشي اللي وقع. على فضايح صبيطارات طنجة. على شوهة صبيطار المامونية بمراكش وفضايحو العالمية. على حروبو الغبية المتخلفة مع اطر الوزارة ومع مندوبي وزارة الصحة اللي حيدهم زمن الحرب على كورونا. دابا البارح وصلنا 33 قتيل ف24 ساعة بسباب كورونا فيروس. رقم كبير بزاف. علاش وصلنا لهاد الرقم المرتفع؟ بسباب خطأ جسيم اخر دارو وزير الصحة. هو التيست. مشات وزارتو شرات تيست سيرولوجي ما صالح لوالو وصفقة كتبنا عليها شحال من مرة فكود. دابا اللي مزيان لحد الان باش يدير الكشف هو "بي سي ار".الطبيب الباحث فالسياسات العمومية الطيب حمضي فسر ل"كود" بسبب ارتفاع الوفيات مؤخرا. الباحث قال "كاين تاخر كبير في اكتشاف الحالات الجديدة وتاخر فالتكفل بالحالات المريضه بكوفيد وما كيتم التعرف عليها تا كتوصل هاد الحالات المتقدمة من المرض وكتوصل للمستشفيات بشكل متاخر بزاف وفالكثير من الاحيان فحالة حرجة او ميؤوس منها" الباحث شدد على ان "عدد الوفيات عندو علاقة بالارقام الحقيقية للمصابين ولي مكنعرفوهاش وماشي فقط بالارقام المعلن عنها ولي كتخص فقط لي تم التشخيص ديالوم رسميا" يعني ان الدولة كتكذب علينا. عدد الاصابات اكبر بكثير من الرقم المعلن وفق تفسير هاد الباحث. دليلو رقم الوفيات. كيفاش نبقاو نديرو 20 الف كشف فاليوم ديال "بي سي ار" وعدد القتلى وصل 33 ف24 ساعة كيف وقع البارح؟ الوزارة شرات تقريبا مليون و200 الف تيست فاللول. عوض ما تشري اكثر بزاف دارت هاد الخطأ ثم هاديك 800 الف تيست سيرولوجي لاش. هاديك قضية اخرى خاص النيابة العامة تفتح تحقيق فيها.
