بسبب ماتشات الوداد والراجا فنهائي البطولة.. طرام كازا غيدي يحبس غدا مع الخمسة ونص

غدا، وعلى غير العادة، طرام كازا غيحبس من محطة ليساسفة فالخط الأول، ومحطة عين الذياب فالخط الثاني، مع ال5 ونص ديال العشية، بسباب النهائي ديال البطولة.
وحسب مصدر من العاملين فطرام كازا، فهذشي غيكون غير غدا وماشي ديما، باش مايكونوش تجمعات فالسونطر فيل بعد فوز الرجاء الرياضي أو الوداد الرياضي فالماتشات اللي غيلعبوها مع 19 دالعشية.
وزاد المصدر نفسو ل"كود" أن هذ التجمعات والاحتفالات اللي كيديرو مشجعين الفريقين فالسونكر فيل ممكن تشاهم فانتقال عدوى كورونا، وإصابة عدد كبير من الناس.
والراجا والوداد عندهم احتمال كبيرة بزاف للفوز بالبطولة، بحكم أنهم جامعين بجوج أكبر عدد ديال النقاط (57 و56 نقطة على التوالي).
والراجا غدا لاعبة مع الجيش الملكي، والوداد مع الفتح الرباطي، وكذلك كاين ماتش ديال أولامبيك آسفي ونهضة بركان، وحسنية أكَادير ومولودية وجدة.