"لاسينيسيس" خرجات الدعم للمرشدين السياحيين

دابا بإمكان المرشدين السياحيين ياخدو الدعم ديال الصندوق الوطني للضمان الاجتماعي "لاسينيسيس"، بعدما تضررو بزاف من جايحة فيروس كورونا المستجد، كتعويض جزافي خاص بالفترة ما بين شهر يوليوز حتى لشهر دجنبر 2020.
وحسب بلاغ للصندوق، فهذ الدعم كيجي تطبيقا لمقتضيات البرنامج التعاقدي المتعلق بدعم القطاع السياحي، وبالخصوص الشق المتعلق بتقديم الدعم للمرشدين السياحيين غير الأجراء المعتمدين من طرف وزارة السياحة.
واللي بغا يستفد من الدعم يدير طلب عبر البوابة الإلكترونية covid19.cncc.ma، وآخر أجل غيركون ف15 فهذ الشهر.
وكان سبق للجامعة الوطنية للمرشدين السياحيين فالمغرب طالبات لجنة اليقظة الاقتصادية باش تلتفت لهذ المرشدين وتتدارس الوضعية ديالهم وتضبر ليهم فالدعم، خصوصا وأنهم مابقاو لاقيين ما ياملو فهذ الجائحة بعدما توقفو الرحلات وكان الحجر الصحي الشامل.
وقالت الجامعة أن المرشدين "لا يخضعون لأي نظام يعوضهم بعد انقطاعهم عن العمل، فهم يمارسون مهنة فالقطاع المهيكل، لكن لا يتوفرون على ضمان اجتماعي"، وهذشي فالظرفية ديال حالة الطوارئ الصحية بسباب فيروس "كورونا" المستجد.