بلطجة. سعيد الناصري هان راسو ما هانش الوداد اللي كبيرة عليه وهان اللي جابوه باش يعاودو التجربة التونسية ويهيمنو على الكورة ويداعيو محاربة الاسلاميين

واش نادي القرن فالمغرب الوداد البيضاوي تعرض للاهانة باش سعيد الناصري رئيسو اعتادر لصحافي "شوف تيفي" على الهجوم اللي تعرض ليه من قبل صحاب الرئيس فدارو فكازا؟ ابدا الوداد اكبر من سعيد الناصري اكبر من امثالو. اكبر ان نادي الحمرا يعتاذر فديكور اخضر. هادي اهانة ليه ماشي لجمهور الحمرا
الناصري اللي تصرف كبلطجي باش هاجم مصورين وهرس ليهم موطوراتهم ودابا ناض بلطجي صاحبو قال ليك مستثمر وعندو "بابكم" وغاديين يشريو نفس الموطورات اللي هرسو٬ هاد التصرف يهمو هو كسياسي فحزب ولادتو كانت خطأ اللي هو الاصالة والمعاصرة.
التصرف البلطجي اللي هو اعتارف بيه وطلب على اساسو المسامحة من صحافي القناة لا يليق برئيس الحمرا.
قبل الانتخابات التشريعية ل2016 كانت رغبة عند جزء من الدولة باش تهمين على الحياة السياسية. فهاد المخطط اللي لعب فيه الياس العماري اللي كان امين عام حزب التراكتور٬ كانت خطة هيمنة رجالات البام على كرة القدم. شدو اندية كثيرة ولكن كانو محتاجين لاندية كبيرة بحال الوداد. دارت خطة باش يتم الاطاحة برئيسها اكرم وكانت بحال موقعة الجمل فمصر وهجمو افراد على النادي لحد الان القضاء ما قال لينا والو على هاد الشي وجا سعيد الناصري اللي عندو سوابق والنكرة فهاد النادي باش يولي رئيسو. كان الهدف المعلن هو محاربة الاسلاميين. وقف زحفهم. ما وقع والو من هاد الشي. بنكيران ربح وشوه الياس العماري وبيادقو اللي الناصري واحد منهم.
تقدم للانتخابات فالدار البيضاء ووظف نجوم الوداد وجيش من المساعدين باش يربح مقعد. خسر فلوس كثيرة وطبع اوراق فوق اللي كينص عليها القانون. خلى ازبال كثيرة فاحياء دائرة انفا البرلمانية. كلشي كيشوف وكلشي سكت على خروقاتو وعلى انفاقو الكبير على باش يربح هاد الدائرة.
المهم كان عندو يتحكم فالوداد. نجح باش دور بيه الانتهازيين فالتسيير. دارها خطة باش يدير ما بغى. نتحدى حتى الوداديين يقولو لينا اليوم اعضاء فمكتب الوداد. شكون الكاتب العام. شكون الناطق الرسمي.... والو. رجع النادي هو الناصري.
حتى دارو رجعها مكتب للوداد فاهانة لتاريخ هاد النادي اللي ظل مستقل حتى فايام قوة ادريس البصري. ظل مرفوع الرأس بفضل رئيسو التاريخي عبد الرزاق مكوار اللي بقى فالمنصب لاكثر من 21 عام من 1972 الى 1993.
دابا الوداد موظفها لخدمة مصالحو الشخصية. حتى مناقشة العقود وتوقيعها ولى كيديرها فدارو. هادي اهانة للكرة. للحمرا.
بعد ما بين الجانب البلطجي فيه ضد صحافي شوف تيفي٬ كانو شي وداديين بغاو يضامنو معاه. كعادتو المهم عندو هو صورتو هو ماشي صورة الوداد تخلى على المتضامنين وحشمهم ومشى عتاذر للقناة.
الوداد ما معنياش بهاد التصرفات الصبيانية لرئيس حتى حد ما عارفو اش كيدير. ما هو رجل اعمال ما هو مقاول ولا كان كذلك يقولو لينا فاش خدام واش من مقاولات كيسير. اللي معروف انو صاحب شي حد كيسميوه مولاهم ادريس من مكناس. اسمو مذكور فقضايا غريبة مثيرة. هادو هما صحابو
خاص الوداد ينقي باب دارو واولها يجري على هادا اللي وسخ صورة نادي كبير ومعاه بغى يرجعو صغير. ماشي تربح القاب بوحدها اللي كترجعك كبير. ايلى كانت الالقاب مع تصرفات بلطجية ما عندها قيمة هاديك الالقاب.
الوداد خاصها ترجع وداد لمغاربة وداد الشعب المغربي وهاد الشي كيبدى بتحريرها من امثال الناصري واسترجاع روح مكوار وثقافتو اللي معروفة على الحمرا