بوريطة داير راسو من محمد السادس. مشى عند جورنال فرنسي وقدم راسو مهندس التطبيع المغربي الاسرائيلي باش يغطي على اللي دارو الجزولي والباز

واحد العجرفة راكبة وزير الخارجية والتعاون ناصر بوريطة هاد ليام فايتة لقياس. الوزير كيعتاقد انو بصاح مهندس عملية السلام او عودة العلاقات مع اسرائيل وكيعتاقد انو هو سباب اعتراف امريكا بمغربية الصحراء. هاد التقني اللي كيحفظ بزاف نتحداه يقنع حتى ناس الصحرا اللي عايشين بيناتنا باقي غير امريكا.
مشى عن طريق فريقو اللي كيلمع ليه الصورة عند واحد من اهم الصحف الفرنسية "لوجورنال دو ديمانش" باش يديرو ليه بورتري فيه باللي هو "مهندس" او "صانع" اتفاقية التطبيع مع اسرائيل. اللي قراه غادي يعرف شكون عطا لخبار لهاد الجورنال وشكون طلب يتكتب هاد الشي.
يعني رئيس الدولة المشرف الفعلي على السياسة الخارجية فهاد المقال ما كاينش. بوحدو بوريطة هو اللي منور لبلاد.
هادا ملف بيد الملك شخصيا وحتى فتوزيعو رئيس الدولة ما معتامدش على لعاب واحد بل على فرقة هو اللي كيقودها. هاد الفرقة فيها اجهزة الدولة المهمة وفي مقدمتها "لادجيد" =المخابرات الخارجية= اللي حافظة الملف مزيان. دابا هاد بوريطة المتعجرف المكبر كاره لعيالات اللي عندهم شخصية غادي يكون بمقام شخصية بحال ياسين المنصوري مدير لادجيد. طبعا خدمتو كتفرض عليه يسكت ويحرث ويتقاتل ولكن ماشي باش يجي واحد بحال بوريطة يصولدي كلشي لصالحو.
لو عولنا على بوريطة يصنع للمغرب ولخارجيتو شي اتفاق كون ضربنا الحيط. عقدو واحقادو على صحابو اللي كانو معاه قبل وتهليتو فاللي كيخدمو لدرجة دار واحد كان كيصايب ليه سباگيتي ايام الزلطة ممثل للمغرب فالاتحاد الافريقي. بحال هادا ما يمكنش يكون صانع سلام مع دولة. راه كينفخو فيه بزاف وولى داير راسو براس رئيس الدولة كاع.