بنكيران ما قالش شي حاجة جديدة باش دافع على العثماني ودافع على قرارات الدولة بالتطبيع مع اسرائيل. راه قالها هادي سنوات واكدها اليوم: اللي دارها سيدنا حنا معاه حقاش عارف مصالحنا وشايف اللي ما كنشوفوهش

بعد ساعات من قرار الرئيس الامريكي دونالد ترامب الاعتراف بمغربية الصحراء عبر مرسوم رئاسي في صفقة معقدة فيها عودة العلاقات بين الرباط وتل ابيب عبر فتح خطوط جوية مباشرة وعودة العلاقات الديبلوماسية٬ اتصلت "كود" بنبكيران لمعرفة موقفه.
رئيس الحكومة السابق قال باللي ما باغيش يهدر فهاد الموضوع لسبب بسيط ان خرجاتو الصحافية ولقاءاتو وخطبو السابقة تفي بالغرض.
بالفعل بالعودة الى ما قاله في السابق تجد ان بنكيران زعيم البراگماتية فالسياسة كان ديما واضح: الديبلوماسية شأن ملكي صرف. حكر على سيدنا. هنا بنكيران ما كيهدرش غير بمنطق عاطفي ابدا. رئيس الحكومة السابق دوز 5 سنين مع رئيس الدولة فهاد الحكومة. عاش امور كثيرة غيرات قناعاتو. غيرات رؤيتو. شاف اشناهي الديبلوماسية. واخا هو قبل كان مع فكرة ان السياسة الخارجية شأن ملكي وخاصها تبقى شأن ملكي٬ ولكن مع الزمن مع التجربة مع الاحتكاك اليومي برئيس الدولة باش كيكون مكلف بشي مهمة بالخارج او مشغول بشي قضية٬ اكتشف كيفاش الملك كيخدم.
موقف بنكيران البارح باش دافع على رئيس الحكومة الحالي سعد الدين العثماني باش وقع اتفاق تاريخي للمغرب بين اميركا واسرائيل والمغرب وفيه بنود الصفقة المذكورة اعلاه٬ كان كيدافع على ما سبق وقالو فالسابق.
الغريب كان يخرج بموقف مغاير. هاكاك كان غادي يكون بنكيران اخر. غادي يكون انتهازي وصافي.
بنكيران جاتو فرص واعرة باش ينتاقم مع حزبو من كاع اللي طعنوه فظهرو باش قبلو بدخول الاتحاد الاشتراكي للحكومة الحالية. كانت طعنة قاصحة خلاتو يبعد على الحزب ولكن ما بغاش يستغل الفرص باش يضربهم.
بنكيران كان واقعي صادم ولكن كان بنكيران. قال البارح فخرجتو ان الملك عندما اتخذ قرار استئناف العلاقات مع إسرائيل ما منع حتى شي حد يعطي رأيو فالموضوع. وجبد موقف الاصلاح والتوحيد المعارض.
لكن الاساسي فكلمتو انو هاجم دعوات من حزبو طلبات بخروج الحزب من الحكومة وتكليف سليمان العمراني بادارة الحزب وقال ان امانة المصباح "اجتمعات وصدرات بلاغ ثمنات فيه قرارات الملك ومساندته للقضية الفلسطينية". يعني كان واضح. ما يمكنش يا السي افتاتي عبد العزيز اللي عضو فالامانة العامة =بلا ما يجبد اسمو طبعا= توافق على بيان بحال هادا وتطلب اليوم اقالة العثماني.
بل ان بنكيران اعتابر هاد الدعوات "تصرفات توحي بنسف بلاغ الحزب" وهادي عندو ماشي سياسة. حقاش حزبو "حزب مؤسسات والمؤسسات تجتمع وتُناقش".
المهم ما كانش هاد الشي بل حديثو علي القضايا المصيرية والسيادية" اللي بيد شخص واحد فقط هو الملك. هنا بنكيران ديما مع فكرة خاصنا تنبعو سيدنا حقاش هو اللي عارف مصالحنا. حقاش هو اللي عندو نظرة ب360 درجة لكل الامور.
هنا بنكيران كيمشي بعيد وكيقلق وكيعصب صحاب "الملكية البرلمانية" وهو مركزية واهمية المؤسسة الملكية والملك محمد السادس فالنظام السياسي المغربي حقاش "المغرب موجود بالملكية وعدم وجودها كان ليسفر عن حرب أهلية وتشتيت المغرب لدول، وذلك إيمانا منه وقناعةً بذلك"
هاد الكلام على المصالح العليا وعلي مركزية الملكية فنظامنا السياسي ما قالهاش غير البارح. قالها هادي سنوات وكررها البارح. غير التوقيت اللي كيعطي لكلمات وقعها فزمن معين. قبل ما كانش حدث بحال توقيع زعيم حزب اسلامي باسم الدولة لقرار مشترك في اطرافو اسرائيل. ولكن الخطاب بقى هو هو وبنكيران بقى هو بنكيران. هو ما غاديش يعتازل السياسة ولكن ما عندوش اطماع للعودة لقيادة الحزب ولرئاسة الحكومة. دارها وما طلب منو حد يديرها. هادا هو بنكيران. حيوان سياسي ما عندناش منو جوج فالبلاد. عندو قدرة الاستشعار بالاخطار وديما سابق امثالو وما كيخافش يقول باش كيحس