كيفاش البي جي دي كيصفي حساباتو مع الامارات وكيصطف مع قطر وتركيا ويوظف محمد السادس والدولة وبوريطة مخلي الديبلوماسية وماديها شكون معايا وشكون ضدي

الحرب بين الامارات العربية المتحدة وبين التنظيم العالمي للاخوان المسلمين اللي منهم العدالة والتنمية المغربي٬ ماشي جديدة. بدات من الربيع العربي واستمرات بشدة من بعد. الامارات فشي وقت دخلات فدعم للبام باش يطيح البي جي دي. غير المغرب ماشي هو مصر لا تونس ولا دول اخرى. المغرب كدولة قدر يخلي دولة الامارات تبعد شوية من هاد اللعب.
المغرب كان واضح. قال للقطريين الراعي الرسمي للاخوان ومن بعد تركيا وقال للامارات المعارضين للتنظيم. قال ليهم بجوج : قودو. هادي بلاد عندها سيادتها. عندها شخصيتها المستقلة عن دول اخرى فشمال افريقيا والشرق الاوسط.
حتى حد ما يقدر يلعب شي لعب كبير. محاولات من هنا ولهيه وتصريحات من هنا ومن لهيه.
غير باش يولي واحد بحال رئيس الحكومة اللي فشل حتى يخرج عند لمغاربة مع هاد الجايحة ويجي لنشاط شبيبة حزبو ويعلن عن موقف الدولة المغربية ورئيس الدولة المغربية من تبادل السفراء بين الامارات واسرائيل ويهاجم هاد الدولة٬ هاد الشي غريب.
غريب حقاش الدولة المغربية لحد الان ما خرجاتش شي بيان رسمي تعبر فيه عن موقفها. غريب حقاش جا من بعد اعلان كبير مستشاري ترامب ونسيبو جاريد كوشنير لزيارة للمغرب. غريب حقاش جا بعد اتصال هاتفي بيم الملك محمد السادس وولي عهد الامارات محمد بن زايد٬ واخا غير تهنئة بمناسبة السنة الهجرية ولكن كان اتصال هاتفي. اكيد تكون فيه هدرة على اكثر من تهنئة سنة لا الامارات لا المغرب كيخدم بيها.
دابا باش يخرج ينعرفة ويقول باللي المغرب والملك يرفض "كافة اشكال التطبيع مع اسرائيل"٬ راه هجوم على الامارات بشكل واضح. ماشي فتح اللي عجبها هاد الموقف بل حركة حماس اللي قالت "نعرب عن تقديرنا لموقف العثماني، رئيس الوزراء المغربي، الرافض بشكل قاطع لكل أشكال التطبيع مع الاحتلال".
لاحظو انو شكر الاخواني صاحبو اولا وقدمو رئيس حكومة واخا السيد كان فنشاط حزبي. حماس بغات كتقول الشعر فالعثماني "الداعم للقضية الفلسطينية" وعندو "موقف ايجابي"
ما عمرنا عرفنا ان الديبلوماسية اللي هي شأن ملكي حتى باش كان بنعرفة وزير للخارجية وجابوه لهاد المنصب وما اقتارحوش عبد الاله بنكيران اللي كان رئيس الحكومة انذاك٬ كانت الديبلوماسية شأن ملكي ماشي حزبي. هو عارف هاد الشي بزاف