باقي النقاش متواصل على مقترح المستشارين لتصفية معاشاتهم.. المكاوي رئيس لجنة المالية ل"كَود": التعويضات كلها من دافعي الضرائب والتصفية مكتدارش غير هكا وصافي

لا زال مقترح المستشارين المتعلق بتصفية صندوق معاشاتهم يثير الكثير من النقاش والجدل بسبب اقتراحه توظيف مساهمة الغرفة الثانية في التصفية. البارح الإثنين تم التصويت داخل لجنة المالية بالإجماع على تزكية مقترح قانون النواب والمصادق على مقترح تصفية المعاشات ونظام تقاعد المستشارين الحاليين والسابقين.
وبعدما وصف عدد من المتتبعين للشأن السياسي اقتراح توظيف مساهمة المجلس يعتبر فضيحة حقاش توظيف لأموال دافعي الضرائب، قال رحال المكاوي رئيس لجنة المالية بمجلس المستشارين ل"كَود"، إن التعويضات كلها من دافعي الضرائب، متسائلا بالقول: "واش كاين شي حاجة من دافعي الضرائب".
وأضاف الاستقلالي المكاوي: "المساهمات التي كانت في ذلك الصندوق كانت مساهمة ديال دوك النواب والمستشارين ويلا مشينا ف التصفية وإلغاء هاد المعاشات داك الرصيد خاصو يرجع للناس اللي عندهوم الحقوق واللّي هوما المستشارين السابقين او كانو فواحد الفترة ديال سنتين. باش تصفي هادشي بالقانون خاصك تدير ليه واحد القانون".
وأوضح المكاوي، في تصريح ل"كَود"، أن التصفية مكتدارش غير هكا وصافي، مجددا تأكيده: "تعويضات البرلمانيين والاشتراكات ديالهوم ومساهمات المجلس حتى هي من دافعي الضرائب وداخلة في التكاليف لي كيكفلها البرلمان".
وأضاف قائلاً: "هادي مساهمات كلها كاتجي من الدولة وكاين واحد لاَبَارْتِي كتحط باسم النائب فداك الصندوق لي كيدبر داك التقاعد وكتجيه باسم كل البرلمانيين واحد المبلغ شهريا على أساس باش يرجع متقاعد باش تبقا ترجع ليه شهريا. اليوم قررنا نوقفو داكشي كامل".
ودافع المكاوي على هاد المقترح وزاد موضحا: "المستشارين سبق الاحداث وغادي يوظف الصندوق قبل ميوصل الوقت ديالو. حنا ماشي بحال البرلمان وكاين اختلاف هنا".