الرمضاني: غنبدّلو شوية اللهجة مع هاد الرباعة ديال "المشرملين الدينيين" لأن الصواب ما يليقش معهم.. لو كان فيهم شوية ديال الترابي ما يبقاوش غير جيب يا فم وقول فحق عباد الله.. كلامهم موسّخ وراسمالهم استعراض الفهلوة اللغوية والغلظة

تدوينة للصحافي رضوان الرمضاني//
دابا غنبدّلو شوية اللهجة مع هاد الرباعة ديال "المشرملين الدينيين"، لأن الصواب ما يليقش معهم، وكيعتقدوا بأنهم بقوة التجييش والكذب والتحامل على عباد الله، مع شوية ديال الآيات من القرآن الكريم تُستعمل بشكل متعسف، غادي يخلعوني...
اسمع يا "المشرمل الديني"، ماشي فين ما كان شي قليل الآداب يجي يركب على سميّتي باش يبان مومن وصالح وكيدافع على الإسلام... هاد البلاد كيحكمها القانون، ويلا كنتِ مومن راك مومن لراسك وما غتفرضش عليا نمط الحياة والتفكير ديالك، ويلا كنت كنسكت راه ماشي حيث ما كنعرفش للتشرميل ديالكم، ولكن حيث أنا إنسان ما كيكذبش باش يحارب الناس وما كيطعنش فالشرف والذمة ديال عباد الله باش يبان هو الصالح، وما كيسبش بالكلام الساقط اللي كيخرج منكم وكتعتبروه حلال...
سمعوني يا معشر "المشرملين الدينيين"، لو كان فيكم شوية ديال الترابي، باش ما نقولش الإيمان لأن الله سبحانه وتعالى بوحدو اللي كيعرف آش كاين فالقلوب، ما تبقاوش غير جيب يا فم وقول في حق عباد الله، وما تبقاوش تفتحوا التعليقات لمن هب ودب باش يبدا يسب ويقذف... واش هاد الشي باش آمرنا الإسلام؟؟ نسبوا الناس؟؟؟
الحمد لله أنكم بديتوا كتخرجوا من الجحور ديالكم... كلامكم موسّخ وراسمالكم استعراض الفهلوة اللغوية والغلظة، والإسلام منكم براء...
جيشوا ما شئتم من قليلي الترابي... والله ما تخلعوني...
ملحوظة: استضفت سينا وأدومة والطراكس ومايا وهادو كلهم مربيين عليكم، على الأقل لسانهم أنظف من أنظفكم، والكبت اللي ساكنكم هو بوحدو اللي مخليكم مهووسين بهم، ومراضين بهم، لو كنتوا أسوياء كنتوا غتبقاو عاقلين على العشرات من غيرهم، ولكن لأن فكركم مريض، ودماغكم في مكان آخر غير رؤوسكم، طبيعي جدا أن تركزوا على صدر مايا أكثر ما تركزوا على لحية رضوان بنعبد السلام...
الرابط:
https://m.facebook.com/story.php?story_fbid=1549593865246816&id=100005886520844&sfnsn=mo