الحاخام شلومو ميارا فحوار مع "كود": المغاربة كيموتو على اليهود واليهود كيحماقو على سيدنا.. ونخاف نمشي فإسرائيل كثر ما نخاف فبلادي المغرب.. والإسلاميين هوما اللي كيديرو المشاكل – فيديو

كشف الحاخام المغربي اليهودي المقيم بإسرائيل، شلومو ميارا، على حب المغاربة الكبير للمغاربة اليهود "فرحو للتطبيع حيت كيحماقو على التعايش والتسامح، وبغاو يجيو لإسرائيل باش يتلاقاو خوتهم وصحابهم"، على حد تعبيرو.
وزاد ميارا، فحوار ليه مع "كود"، أن حب اليهود المغاربة للملك ماكيتصورش، بحيث "الحلم ديالهم هو يشوفوه، وكيعزوه معزة خاصة وكيحترموه، كثر من أي واحد، وعندهم كبير بزاف وكيبغيوه بزاف".
وقال أن الملك هو اللي طمح لتطبيع العلاقات مع إسرائيل "كثر من ناتنياهو أو رئيس ميريكان او اي واحد، سيدنا ماشي كيهضر على التعايش لكن كيمارس التعايش وكيديرو"، على حساب هضرتو.
وأكد الحاخام اليهودي، أن المغاربة مربيين على التعايش، حيت الملك محمد السادس كيطبق التعايش وكيطمح ليه، ودار بزاف دالتضحيات على قبل اليهود المغاربة.
وزاد: "كيقولولي واش ماكتخافش تمشي للمغرب، بلاد المسلمين، كنقول ليهم بالعكس، نخاف نمشي فإسرائيل كثر ما نخاف نمشي لبلادي المغرب".
وقام الحاخام شلومو ميارا بإصدار جوج كتب على الملوك المغاربة، بعنوان الصالح بين أمم العالم، كيهضرو على الملك محمد الخامس والملك الحالي محمد السادس، وفيهم شهادات حية ووثائق تاريخية على كيفاش وقفو معاهم، بالإضافة لتوقيع كبار حخامات إسرائيل، لتاكيد ما جاء فالكتابين، وعرفانا للملوك بجوج.
وقام الحاخام بتقديم الكتب هذ الاسبوع للديوان الملكي، من بعد ما دار لقاء مع المستشار الملكي اندري آزولاي، من أجل عرضهم على الملك محمد السادس، وكيتمنى من قلبو من بعد هذ الخطوة يتلاقى بيه.
وكان سبق للحاخام تلاقى محمد السادس ف2019، وقدم ليه كتاب "ملوك الفضيلة والرحمة"، اللي كيهضر على فضل الملوك الثلاثة، محمد الخامس والحسن الثاني ومحمد السادس، على اليهود المغاربة.