مزال ما سخنش بلاصتو.. "الماص" فسخات الكونطرا مع كَاموندي من بعد شهرين من التعاقد معاه ومسؤول فالفرقة ل"كَود": ماعطا حتى قيمة مضافة وها السميات المقترحة من بعدو

نادي المغرب الرياضي الفاسي غايخسر فلوس بلا فايدة بسباب فسخ العقد مع مدرب ما جاب حتى جديد للفرقة.
الفريق الفاسي الذي يحتل حاليا المركز 10 في القسم الوطني الأول برصيد 15 نقطة، هادي شهرين بالضبط كان وقع عقد مع المدرب الأرجنتيني أنخيل كَاموندي، خلفا للإطار الوطني عبد اللطيف جريندو، و دبا قرر ينفصل عليه.
وحسب مصادر "كَود سبور"، فإن الماص خاصها دبا تحط 60 مليون سنتيم باش تقدر تفسخ العقد مع المدرب كَاموندي حقاش بنود العقد معاه واضحة، وتنص على تقديم هاد المبلغ المالي في حالة فسخ العقد من طرف واحد.
هاد المدرب اللي قال مصدر من إدارة الفريق الفاسي كايشد شهريا صالير ديال 20 مليون سنتيم، وأشار إلى أنه ماعطى حتى شي قيمة مضافة للفريق الفاسي الذي يطمح حاليا لكي يحتل المراكز الأولى في القسم الوطني الممتاز.
مصادر مقربة من رئيس الفريق قالت ل"كَود سبور" أنه كاينة أسماء معروفة غادي يتم الاتصال بها خلفا للمدرب كَاموندي. ويتعلق الأمر بكل من رشيد الطاوسي اللي كان حقق نتائج جيدة مع الفريق ومحمد فاخر وفوزي جمال، تضيف ذات المصادر.
إدارة الفريق كاتدير حتى اتصالات مع مدربين مع تونس. الأمر يتعلق هنا حسب مصادر "كَود سبور" بالمدربين قيس اليعقوبي وأحمد العجلاني.