يوميات ابيدجان: من مقر اقامة المنتخب: واخا بعدوهم. مغاربة كثار وصلو لاقامة المنتخب ورونار ولى نجم واخا باقي ما جابش التأهيل للمونديال وها التحدي اللي دارتو ليه باسكال الايفوارية

هاد الرغبة الكبيرة للوصول الى المنتخب الوطني الى لاعبيه الى التقاط صور معهم فاقت كاع الاجراءات اللي دارتها الجامعة الملكية المغربية لكرة القدم باش تعزل الطاقم التقني واللاعبين فبلاصة ما يشوشش عليهم الجمهور. الاسود مقيمين ف"سوفيل لاتور" المطل على حي بلاطو وعلى المشروع المغربي الايفواري الكبير "باي دو كوكودي" اللي فيه ناس مارشيكا باغيين يصايبو مركز كبير للمدينة.
كاينة حراسة صارمة ماشي حقاش المنتخب كاين ولكن حقاش هاد الدولة ضربتها الجماعة الارهابية "المرابطون" هادي اكثر من عام وبدات حراسة الفنادق والمقرات المهمة مراقبة صارمة. تفتيش السيارات باليات ومعرفة الوجهة. هاد الشي كولو ما منعش المغاربة يجيو يشوشو على المنتخب على تركيزو. اللي لقاوه فالاستقبال يبداو يتصورو معاه ويسلفيو معاه. بنات وولاد. هيرفي رونار مدرب الاسود اللي كان درب قبل الفيلة بان فالطابق الارضي. تلاحو عليه بنات وتبعوهم ناس خراين. كلهم كيتمناو ليهم وليه حظ سعيد. كلهم كيمناوه يتفوق وطبعا هادي امنية ليهم ولجميع المغاربة.
كلهم لمغاربة. حقاش كاينين ايفواريون عندهم موقف اخر. ايفوارية تعمل في بار الفندق قالت ل"كود" انها التقت رونار صباحا واخبرته انه لن يعود بالتآهيل من ابيدجان وان المنتخب الايفواري ايلى تكايس على الاسود غادي يربحهم بواحد لزيرو. السيدة واسمها باسكال ذهبت ابعد ودخلت في تحدي ساخر مع المدرب "قلت ليه ايلى ربحتي دي صالير ديالي ولا ربحنا عطيني صاليرك".
لمغاربة اللي كيدورو فهاد لوطيل واللي كيدورو فلوطيل القريب منو لنفس الشركة واسمه "سوفيتيل ايفوار" مرفحين في غالبيتهم. كاين اللي حجز تماك ومن زمان وكاين اللي جا مع الشركات الداعمة للمنتخب وكاين اللي ما عندو علاقة غير جا يقلب على الصور ولا على التذاكر ولا شي حاجة اخرى.