من غير لاكريز مع المغرب. ازمة داخلية فالصبليون على استقبال غالي. المخابرات ديالهم ما فراسها والو وكلشي نسقاتو وزيرة الخارجية ووزير الداخلية وفخبار مخابرات الدزاير

معطيات حساسة كشفها الصحافي اگناسيو سمبريرو فمقالو اللي تنشر ف"ال كونفيدانسيال" على قضية دخول زعيم البوليساريو ابراهيم غالي مخبي لمستشفى لاگرونيو باسبانيا.
الصحافي قال ان مهندسة هاد الدخول بعد رفض المانيا استقبالو وبعد ما دوز سيمانا فمستشفى عين النعجة العسكري٬ هي وزيرة الخارجية لايا گونزاليث. اكثر من هاد الشي. الصحافي فمقالو اكد ان المخابرات الاسبانية "اس ان اي" =المكتب المركزي للتجسس= ما فخباروش هاد الشي.
وزيرة الخارجية لايا اتفقات مع وزير الخارجية الجزائري بوكادوم باش يدخل بوثائق ديبلوماسية حقيقية واسم مستعار. وهادا ما كان نهار 18 ابريل. جابتو طيارة جزائرية. باش يسهلو دخولو٬ يضيف المقال٬ اتصلت الوزيرة بزميلها فالحكومة وزير الداخلية فرناندو مارلاسكا باش يسينو ليهم جواز السفر فمطار "ساركوزا" باش نقلوه لصبيطار سان بيدرو .
طبعا هاد الشي بلا خبار بلا اشراك المخابرات الاسبانية فالمقابل كان تنسيق مع المخابرات الجزائرية.