اردوگان باغي ياخد لجنة القدس. علاش بوريطة كيخبي علينا اتصالو بوزير خارجية تركيا ومصدعنا بدول ما عندها وزن. كيفاش قولبو اوغلو وهدر ليه على لجنة القدس اللي من المفروض هو اللي يبادر فالاتصال حقاش هاديك ديال سيدنا

البارح الاثنين 11 ماي 2021 ناصر بوريطة وزير الخارجية والتعاون دار اتصال مع وزير خارجية تركيا مولود تشاووش اوغلو. بوريطة اللي عندو اسهال كبير فارسال اي نشاط تافه دارو٬ ما جبدش الموضوع. البارح نيت دار اتصالات ب"الفيزيو كوفيرونس" مع وزراء خارجية الكونگو ورواندا والطوگو. هاد الاتصالات هدر عليها ورسل بيانات وصور عليها.
لكن الاتصال مع وزير خارجية تركيا ما جبدوش واخا موضوعو مهم. ماشي باهمية الصحرا ولكن مهم. كيهم دور بلادنا باعتبار رئيس الدولة هو رئيس لجنة القدس. الاتراك خرجو لخبار فوكالة "الاناضول" وفيه ان "وزير الخارجية التركي مولود تشاووش أوغلو" بحث "مع نظيره المغربي ناصر بوريطة، إمكانية اجتماع "لجنة القدس" التابعة لمنظمة التعاون الإسلامي"
واضاف المقال "جاء ذلك في اتصال هاتفي جرى بين الوزيرين، الإثنين، وفق مصادر دبلوماسية في الخارجية التركية، وذلك عقب اقتحام القوات الإسرائيلية لباحات المسجد الأقصى والاعتداء على المعتكفين داخله". يعني ان رئيس ديبلوماسية المغرب اللي كيرأس ملكو لجنة القدس ماشي هو اللي كيبادر بالاتصال بل التركي هو المتصل. ثانيا ان التركي هو اللي سرب الاتصال والمغربي ما خبر حتى حد.
دابا وزير خارجية تركيا قولب بوريطة وبزاف. حقاش لكمالة ديال القصاصة اللي نشراتها "الاناضول" هدرات بشكل مستفيض على لجنة القدس ولكن ما فيهاش ولى اشارة وحدة باللي المغرب هو رئيس اللجنة. ثم فيها ان الاتراك هما المبادرين لعقد هاد اللجنة. هذا عندو معنى واحد هو ان تركيا باغية تاخد هاد اللجنة اللي خرجات من المؤتمر الإسلامي السادس لوزراء خارجية المنظمة اللي تعقد فجدة بالسعودية خلال الفترة من 12 إلى 15 يوليو عام 1975.
فقصاصة "الاناضول" تقطار الشمع علي المغرب باش كتبو باللي كاين اقتحام لقوات الاحتلال الاسرائيلي للمسجد الاقصى ومحيط البلدة القديمة فالقدس وكاين احتشاد فلسطيني لمنع الاقتحام وكاين تحرش كبير واعتداءات ف"باب العامود" وحي "الشيخ جراح" ومحيط المسجد الأقصى.
تركيا بهاد الشي كتقول باللي هما احق بلجنة القدس. اردوگان رئيسهم ديما منيش على هاد اللجنة.
فهاد الشي كولو بوريطة طلع صغير غبي غير متمكن من قوالب الديبلوماسية. بقات فالجلالب والاتصالات بدول ما عندها وزن فالعالم. ها هو ضحك عليك التركي المتمرس وبقى تابع الزواق ولخوا الخاوي.
اليوم عاد حاولتي فالجامعة العربية تطلب دول الخليج باش يهدرو على دور المغرب كرئيس للجنة القدس باش ترد على اللي دارو فيه اوغلو.