سكوب. فضيحة سياسية فكازا. ليديك بدا يفصل فخارطة لمدينة ومعولة على البام. ابو الغالي دار عشا وها اللي حضروه من حزبو ومن ناس الشركة باش يعانونهم فالانتخابات وها الطاشرون ديالهم

علمت "كود" ان صلاح ابو الغالي القياديي، الأمين الجهوي لحزب الأصالة والمعاصرة بجهة الدار البيضاء دار عشا البارح فدارو فكاليفورنيا وحضروه ناس من حزبو مع الطاشرون العلام مصطفى اللي كان خرق حالة الطوارئ ودار عرس وما دارو ليه والو٬ بالاضافة الى كبار مسؤولي شركة "ليديك".
وفق مصدر "كود" هاد لعشا اللي دارو فيه جوج طابلات٬ حضر ليه جون باسكال رئيس شركة "ليديك" ونائبو علي گرموش اللي هو فالحقيقة ذراعو مع المنتخبين ومع الداخلية بالاضافة الى فاصيحي اللي مكلف بالاشغال الكبرى فليديك.
وفق مصدر "كود" فابو الغالي عرض على سعيد الناصري رئيس الوداد اللي باغي يعاود يترشح للانتخابات التشريعية فانفا وعبد الرحيم بنضو مول الفروماج اللي حتى هو بامي وسعيد رفيق رئيس جماعة بن يخلف والطاشرون الصديق للي كان فجماعة لهراويين عن حزب التقدم والاشتراكية وعزلو عامل مديونة الشگاف قبل ما يركب التراكتور وباغي يترشح مع البام بالاضافة الى بعض رجال الاعمال ورئيسة شبيبة الحزب نجوى كوكوس.
هاد سعيد الناصري كان دار الڤاكسان عند الاماراتيين فسفارتهم فالرباط وما تسناش حتى بدا فبلادو. اليوم مشى عند لفرانسيس يعاونوه باش يربح. واش هادو بعلقهم
هاد لعشا حضر ليه كيف قلنا العلام ودارو ليهم جيگوات الغنمي وسفة بالكسكسو وشي بركة اخرى تشرح مصادر "كود". لكن الاساسي ماشي المالكة ولكن هاد الشركة اللي خرباتها على كازاوا ودابا باغية تجري على البيجيدي وتجيب البام لرئاسة مجلس المدينة وجهة الدار البيضاء.
الحزب فكازا معول عليهم كيفما معول على الطاشرون مصطفى العلام يعاونهم فتمويل الحملة الانتخابية.
هاد العشا كولو دار باش يلقاو الطرق باش يدعمو البام فالانتخابات.
هادي فضيحة كبيرة ان شركة خاصة عندها مصالح مع مجلس المدينة بدات تنوعر وكتفصل فخرائط كازا السياسية. هاداك نائب رئيس شركة ليديك هادا هو تخصصو. وفين صاحبنا وهبي اللي ديما محيح. واش قابل ان دولة اخرى تدخل فانتخابات بلادو؟
ثم هاد الشركة كازاوا رافضينها على غلاء الفاكتورة وعلى خدمتها العوجا اخرها الفيضانات اللي دارت فكازا. عوض ما يفكرو فالسياسة يفكرو فخدمتهم