#أنقذوا_سليمان_الريسوني.. قضية الصحافي المعتقل شادة الطوندونس ف تويتر

قضية الصحافي سليمان الريسوني لي وصل ل66 يوم من الاضراب على الطعام منوضة حالة في التويتر المغربي، وهاشتاكَ #أنقذوا_سليمان_الريسوني شاد الطوندونس.
بزاف ديال المتعاطفين مع الصحافي غردو بمختلف اللغات وبغاو المسؤولين يشوفو من حالتو ويطلقو سراحو.
بنت خوه الصحفية هاجر الريسوني، كتبات في تويت : "‏هل سيقوى الصحفي سليمان الريسوني على المقاومة لأيام أخرى؟؟؟!!!! لا تنسوا أن تطرحوا هذا السؤال على أنفسكم قبل النوم وعند الاستيقاظ صباحا".
وقررات غرفة الجنايات الابتدائية بمحكمة الاستئناف فكازا، نهار الخميس، تأجيل المحاكمة ديالو حتى لنهار ثلاثاء الجاي 15 يونيو.
‌وفتصريحو ل"كود"، قال دفاع الريسوني، ميلود قنديل، أن الصحافي كان فحالة صحية صعيبة، وجابوه مع جوايه التسعود ديال الصباح، ومانطالقات المحكمة حتى للوحدة، وهكذا بقى على هاد الحال حتى ل7 ديال العشية فين تقرر تأخير الجلسة.
وزاد قنديل أن دفاع الريسوني ماقدمش الدفوع الشكلية اللي كان من المقرر يقدمها اليوم، بسبب الوضعية اللي كان فيها الريسوني، واللي ماكانتش كتسمح بالمناقشة، من بعد ما وصل لليوم 62 من إضرابو على الماكلة.