باش تعاون بلادها فمواجهة كورونا.. لاعبة التنيس التونسية أنس جابر حطات الراكيت ديالها للبيع فالمزاد.. ووصلات ل11 مليون سنتيم فيوماين

قررات أنس جابر لاعبة التنيس التونسية، تحط الراكيت ديالها للبيع بالمزاد العلني، باش تتبرع بثمنها لشراء الأدوية والمعدات الطبية اللازمة لبلادها، اللي كتعرف ازمة صحية وصفت ب"الكارثية" بسباب فيروس كورونا المستجد.
ففيديو ليها نشراتو فحسابها على "فيسبوك"، قالت جابر "مانحبش نشوف بلادي تمر بظروف صعيبة كيما هكذا، فجاتني فكرة نحط المضرب ديالي للبيع".
https://m.facebook.com/story.php?story_fbid=363554771804481&id=100044498826844
وثمن المضرب الأولي اللي وضعات جابر هو 2000 دينار، أي ما يعادل تقريبا 6000 درهم مغربية، "وكنتمنى تجيب كثر، والفلوس اللي غيجيبها غنشريو بيها الادوية والمعدات الطبية اللازمة، وانا شخصيا غنزيد واحد القدر مالي باش نزيدو نعاونو"، كيف قالت جابر.
وغير لبارح، صرحات الناشطة هاجر إدريس اللي كتشرف على المزاد، أن الراكيت ديال جابر وصلات فالطوطال ل35 ألف دينار، أي ازيد من 11 مليون سنتيم مغربية، وقالت أن الطموح هو الوصول لمبلغ كيمكن من شراء وحدة إنعاش كاملة.
https://m.facebook.com/story.php?story_fbid=2401934803275892&id=100003781862155
وكانت تأهلات جابر مؤخرا لربع نهائي دورة ويمبلدون البريطانية، كأول امرأة عربية وأفريقية توصل لهذا الدور المتقدم، فأكبر بطولة لرياضة تينيس فالعالم.
ومؤخرا، ولاو يموتو يوميا فتونس كثر من 100 شخص بالفيروس وعلاين 10 الاف كيتقاسو، وكاين بلوكاج واكتظاظ فاقسام الإنعاش، وانهيار فالمنظومة الصحية.