كون كانت شي اشاعة على أنه اللقاح كايكبر الترمة و لا كايزيد فطول القضيب الاغلبية ديال المشككين و المشككات غاتلقاهم شادين الصف ماكرهوش يديرو ستة د الجرعات بلاصة جوج ! كون يصيبو يفرقوه عليهم بالبوديزات!

زمان كحل هذا لي كانعيشو فيه و لي أي واحد كايشوف راسو أنه قادر يناقش و يعطي رأيو فأمور علمية بعيدة عليه ! الانترنيت و الڤيديوات د يوتوب و المنشورات د فايسبوك و المقالات السريعة فحال هادشي لي كانكتب انا نيت خلات واحد الفئة جديدة تبان ديال الجهال لي كايصحاب راسهم قاريين ! صحاب نظرية المؤامرة و الارض مسطحة ماشي كروية و لانازا مخبياها علينا و ماعمر الانسان مامشا للقمر و حگا ما حگا كورونا مؤامرة على المسلمين و اللقاح فيه الشريحة ديال التجسس و آخر الخرجات لي كانسمع مؤخرا " اللقاح كايسبب العقم"
فعز كورونا و فوقت لي البلاد كاتسجل ارتفاع كبير للحالات و مصيبة فالسبيطارات مازال شي مكلخين و مكلخات من نيتهم كايشككوا فنجاعة اللقاح و بل كاينسبوا ليه شي اضرار ماعرفتش منين كايجيبوها ! " البنات واش بصح اللقاح داروه لينا باش مانولدوش ؟ " " البنات ماعرفتش واش نمشي نتلقح و لا لا ؟ راجلي قاليا راه كايدير العقم " ! وا خدمي نتي آ الدولة و الاطباء و السبيطارات و القياد و خدمو نتوما آ اللابوراطوارات ديال الدوا و تقاتلو مع الوقت باش توفرو الڤاكسان لعباد الله فابور باش تجي السعدية من دوار الطز و راجلها المعطي لي عندو باك موان ديس باش يقوليك " بغاونا مانلدوش "
شكون حاشاها لطاسيلة امك اصلا نتا ؟ شكون نتا اصلا باش الدولة و لا الماسونية و لا ميريكان يفكرو يقطعو ليك الجذر ؟ كاتولد شي علماء خاربينها اختراعات! كاتولد شي اطباء ! شي دكاترة ! شي رواد فضاء ! ياك كاتولد غي الديشي ديال الانسانية ؟ غي الخراية و الحزاقة صحاب دوبل طيط نتا كاتهضر معاه فالشرق و هوا كايجاوبك فالغرب عايشين غي باش يخنقوا الواد الحار ! لا زين لامجي بكري نتا حمار كاتموت كاتخلي وراك ثمنية د الحمير كايشبهو ليك !
بغاو يحاربو الاسلام
بغاونا مانولدوش
بغاو يتجسسوا علينا
بغاو يتحكمو فينا
و ناس قاريين و كاتلقاهم تاهوما كايروجو لهاد التخربيق! حيت ماكاينش البون سونس ! علاش غايحاربوك؟ علاش غايتجسسوا عليك ؟! كيفاش غايتحكموا فيك اكثر ماهوما متحكمين فيك دابا نيت ؟
الحاصول ! مصيبة كحلة مع هاد الجهال لي ماكايحشموش على الجهل ديالهم!