بالفيديو. كيفاش بوريطة كاره لعيالات القادات بغى يدافع على المغربية صدق محتاقر الامازيغ

خاصك تكون غبي بصاح باش دير الزبلة اللي دار وزير خارجيتنا ناصر بوريطة. فالحقيقة ماشي زبلة. هادي عصارة تفكير هاد البوريطة. تفكيرو العنصري. كيفاش فدستور جديد يهين اهم مكون فالمغرب اللي هو المكون الامازيغي. كيفاش هاد بوريطة عبر شي وحدة ماشي ذكية معاه فالديوان اسمها حفصة غزاوي ونصائح العبقري اللي جابو للتواصل وكيوجد يعطيه المنصب فؤاد عاريف اللي ما قبلش ما يبقاش مدير لقطب امريكا الشمالية فلاماب ودخل اللي يسوى واللي ما يسواش باش يفرضو على مديرو يخليه وباش فشل خدا سنة وجابو للخارجية٬ كيفاش سب لمغاربة. هاد الجوج هما اللي فتاو عليه رأي غبي. فيه بين باللي وزارة الخارجية والتعاون كدافع على النساء.
جا دار فيديو جاب بعض معارفو اللي مدينات ليه بالبوسط باش يخرجو يكولو كلام بليد. باللي فالخارجية ما كاينش تعامل دوني مع المرأة. اي واحد خرج هاد الخطاب ففيديو دعائي عرفو راه بصاح كاين تعامل دوني. كاين احتقار للمرأة.
فهاد الفيديو المسؤولات المديرات او السفيرات والقنصلات كيهدرو اما بالعربية او بالانجليزية او بالفرنسية او بالاسبانية بينها اللي كيهدر بالامازيغية هي عاملة النظافة. هاد العاملة عندها احترام كبير وخاصو يكون. ولكن علاش دوز بوريطة وعطى هاد الرسالة المتخلفة على مكوننا الامازيغي.
دارها حقاش فعمقو كيكره لعيالات اللي فيدهم. كيكره اللي يواجهو من النساء. باغي المطيعات صحابات نعام اسيدي اللي كيبندرو ليه وما يرفعوش الصوت قدامو. الفيديو كيبين معدنو