شارية فضح بنعرفة: جا فالطوموبيل ديال الدولة باش يحط الترشيح ديالو للانتخابات وهذا أمر غير مقبول – فيديو

استنكر المحامي إسحاق شارية، استغلال رئيس الحكومة، سعد الدين العثماني، للطوموبيل ديال الدولة، باش يحط الترشيح ديالو للانتخابات التشريعية، عن دائرة الرباط المحيط.
المحامي، اللي مرشح فنفس الدائرة، بصفة "الأمين العام للحزب المغربي الحر"، كشف ففيديو ليه على صفحتو ففيسبوك، أنه لبارح فاش جا يحط الترشيح ديالو، لقى العثماني جاي فالسيارة ديال الدولة، وبالسائق اللي كتخلصو الدولة باش يحط ملف الترشيح، واعتبر هذشي أمر ماشي مقبول.
https://www.facebook.com/chariaisaac/videos/201841531927367/
وتوجه شارية بكلامو لوزير الداخلية، وللجنة المكلفة بالانتخابات، وقال أن هذ الشخص، باعتبارو المنافس ديالو على نفس الدائرة، كيستعمل أدوات الدولة لاستمالة أصوات الناخبين، "واللجنة القانونية للحزب ديالنا سجلو استغلالو لسيارة الدولة، وبالتالي هذ الأمر غدي نمشيو فيه إلى حدود الطعن"، حسب تعبير شارية.
وهضر شارية فنفس الفيديو على ممارسات أخرى فاجآتو، من قبيل وعد برلماني، ماذكرش الإسم ديالود لمجموعة من الشباب باش يصوتو عليه، وغادي يخدمهم فسبيطار مولاي يوسف، أو يعطيهم البيرمي دكونفيونس، وعلق شارية على هذشي وقال أن هذي كذبة باينة، حيت كون بغا هذا يعاون الشباب كان يديرها قبل وهو برلماني.
وكانت المحكمة عطات الشرعية لمحمد زيان، باعتبار الأمين العام الحقيقي للحزب المغرب الحر، لكن شارية مازال متمسك بهذ المنصب، وعلن ترشيحو باعتبارو رئيس الحزب.