الاستقلال غادي للانتخابات بتنظيم مهلوك.. منتخبين فالرباط والشرق رفضو يسمعو لنزار بركة وجهة الصحراء مستقلة عن القرار المركزي

حزب الاستقلال مهلوك تنظيميا، هادشي ملي جا حميد شباط والمشاكل كتزاد، وفاش جراو عليه في مؤتمر "حرب الطباسل" وحطو بلاصتو نزار بركة، حفيد علال الفاسي. وباقي الاثر كيبان فكل محطة انتخابية، اخرها ما حدث في انتخابات الغرف المهنية، شفنا اول لبارح واحد فوجدة قال بلي توصل بتهديدات باش يسحب ترشيحو، والبارح استقلال اخر رفض يسمع لنزار بركة وتحداه فانتخاب مكتب غرفة التجارة بجهة الرباط.
البارح عاينت "گود" الواقع التنظيمي لحزب الاستقلال فين وصل، لدرجة ان المرأة الحديدية ف نقابة الاستقلال خديجة الزومي جات بالقرب من قاعة انتخاب مكتب غرفة التجارة والصناعة والخدمات بجهة الرباط، باش تقنع لائحة حزب الاستقلال تصوت على رجل اعمال اتحادي حسن الساخي (مول شركة ديال الحراسة المعروفة كتشد الملاعب الرياضية).
لبارح تبين باللي الاستقلال مبقاش ضابط القيادات ديالو، بحيث أن منسق الاستقلال بالرباط عزيز الهلالي، تمرد على الاتفاق اللي طرا بين زعماء الاحزاب (الاتحاد، الحركة، الاستقلال، الاحرار) اللي تحالفات باش تعطا الرئاسة للاتحاد الاشتراكي.
الهلالي منسق الميزان، دار خاويا فعامرة لأمينو العام نزار بركة، وقدم مرشح حين انعقاد جلسة انتخاب مكتب غرفة التجارة، مع العلم انه حصل اتفاق فيما سبق لإعطاء حزب الاستقلال الخلافة الاولى.
وبعد التصويت حصل مرشح الاتحاد الاشتراكي على 65صوتا فيما حصل مرشح الاستقلال على 49 صوتا، وبذلك كيستناه حساب عسير عند اللجنة التنفيذية لحزب الاستقلال اللي غادير اجتماع قريبا.
مصادر "گود" قالت بلي الاستقلال عندو مشاكل كثيرة فالشرق وجهة الرباط سلا القنيطرة، بالاضافة الى ان الجنوب مستقلة عن المركز (اللجنة التنفيذية) في تدبير الانتخابات، طبعا اللي متحكم فيها هو ولد الرشيد اللي وصل يتحكم حتى ف جهة كلميم وادنون.