روينة فانتخابات الغرف المهنية بجهة الرباط. مدابزة بين الأحزاب على رئاسة غرفة التجارة.. ومصدر ل"گود": الاحرار دا جوج رئاسات والمرشح تالموست عندو حظوظ يدي التجارة

التوافقات الحزبية رونات انتخابات الغرف المهنية بجهة الرباط سلا القنيطرة، بحيث ان هاد التحالفات بغات تقطع الطريق على المرشح الحسيت تالموست لمنصب رئيس غرفة التجارة والصناعة والخدمات باسم الاحرار.
وبسبب وجود اتفاق بين الاحرار والبام والاتحاد الاشتراكي، هاد الغرفة الاحرار فالرباط باغي يعطيها للاتحاد واخا معندوش الاغلبية في اطار الترضيات الحزبية.
وحسب معطيات "گود" فإن المرشح تالموست عندو جوج لوائح كينافس بها، واحدة ديال اللامنتمين والثانية ديال الحمامة، هادشي للي خلا تشكيل مكتب غرفة التجارة مستحيل فهاد الظروف حيث مكاينش النصاب عند باقي الاحزاب بدون لوائح تالموست.
الاحرار كيترأس دبا جوج غرف هوما الفلاحة و الصناعة التقليدية، الاخيرة حط فيها خو مول العسل المعروف الزمزامي.
هاد المعطى خربق الاوراق الانتخابية، تالموست كعا وخلط الاوراق ورون كولشي.
اضافة الى ذلك حتى الاستقلال والبام مزال كيتفاوضو بعيدا عن الانظار على رئاس غرفة التجارة، تارة بتيفلت وتارة بالرباط. مزال محسموش هاد المنصب ديال رئاسة غرفة التجارة.
اللي كعا تالموست كثر، هو ان عبد الله عباد، رئيس الغرفة السابق واللي مكيعرفش حتى يهضر وكولشي كاعي عليه خصوصا تجار العاصمة، هو اللي بغا يرشحو ودفع بيه باش يترأس الغرفة، ولكن دبا تراجع.
البام والاستقلال دارو مرشحين مبغاوهمش المنتخبين والمهنيين، ويتعلق الامر بكل الدراجي عمر باسم التراكتور وسبق ليه ترأس الغرفة وتجربتو كانت فاشلة فالتدبير حسب مصادر حضرت كواليس الاجتماعات، والمرشح الثاني ديال الاستقلال يتعلق بالساخي رشيد كان جا من البي جي دي معندوش شعبية وسط المهنيين وتا هو مرفوض.
البلوكاج سيد الموقف فهاد الانتخابات، الاحرار لاح الكرة للاستقلال والبام.
الاحرار عندو حظوظ يترأس هاد الغرف بثلاثة ولكن فحالة دعم مرشحو تالموست.